Екібастұзда өтетін ән кешінің жарнамасын рұқсатсыз орынға ілген Әбдіжаппар Әлқожаға ескерту жасалды. Жедел-профилактикалық бөлімшенің полицейлері әншінің рұқсат етілмеген аймаққа ілінген сегіз жарнамалық парақшасын анықтаған деп хабарлайды pavlodarnews.kz сайты.
"Қазіргі уақытта Екібастұздағы аялдамалар жаңартылды. Бірақ олар әлі күнге жарнама ілінетін тақтайша қызметін атқаруда. Оларды алып тастау оңай сияқты. Оларды алған соң артынан клей іздері мен скотчтар қалады. Жапсырма қағаздар қала сәніне кері әсерін тигізеді.
Қаладағы Әуезов пен Абай көшелерінің қиылысында отандық әншінің кешіне арналған жарнама ілініп тұрды.
Аймақтық полицейлер кеш ұйымдастырушыларына хабарласып, жарнаманы алу керектігін ескертті. Осындай заң бұзушылық анықталған жағдайда, 20 АЕК (48100 теңге) айыппұл төленеді. Ал жағдай қайталанса, айыппұл саны бірнеше есеге ұлғаяды", - деді Павлодар облыстық полиция департаментінің баспасөз қызметі.