Шымкенттік дәрігерлер сүйел кетіретін «Чистотел» дәрісінен уланған өзбекстандық кішкентай бүрдіршін қызды құтқарып қалды. Бұл туралы қалалық Денсаулық сақтау басқармасы хабарлады.
Ауыр жағдайда жедел жәрдеи көлігімен Гипербариялық оттектеу орталығына жеткізілген сәби жан сақтау бөліміне жатқызылған. Дәрігерлердің айтуынша, улы сұйықтық баланың аузын күйдіріп жіберген. Қазір оның жағдайы жақсарған, ол жан сақтау бөлімінен палатаға ауыстырылды.
«Уланған бала анасымен бірге ауруханада ем алып жатыр. Өзбекстанның кішкентай тұрғыны Шымкентке ата-анасымен бірге қонаққа келген", - дейді ведомствода.
– Дәріханадан папилломаны кетіру үшін "Чистотетел" сұйықтығын сатып алғанбыз. Балам ойнап отырып, байқамай оны ішіп қойған. Қызымның жағдайын көріп, бірден жедел жәрдем шақырдым, – дейді анасы Сарбиназ Аронова.
Қазір аузы күйген бейкүнә сәби тамақтана алатын жағдайда. Әрі қарай да дәрігерлердің бақылауында болады.