Тараз қаласында «Әмір және Д» ЖШС қоймалары бар фармацевтикалық өндіріс кешенінің құрылысын жүргізуде. Мұнда экспресс тест пен медициналық мақсаттағы бұйымдар шығарылады. Жобалық қуаты – жылына 15 миллион экспресс тест, 1,5 миллион бақылау ерітіндісі және зарарсыздандыруға арналған 50 мыңға жуық орама.
Серіктестік басшылығының айтуынша, жаңа өндіріс кешенінде 150-ден аса жаңа жұмыс орны ашылады деп көзделуде. Құрылыс барысымен танысқан облыс әкімі Бердібек Сапарбаев фармацевтика өнеркәсібі стратегиялық маңызы бар бағыттардың бірі болып қала беретіндігін атап өтті. Президент Қасым-Жомарт Тоқаев «Жаңа жағдайдағы Қазақстан: іс-қимыл кезеңі» атты Жолдауында фармацевтика саласын аяққа тұрғызатын уақыт жеткенін баса айтқан болатын. Бүгінде өңірдегі бес жергілікті компания дәрі-дәрмек өндірумен айналысады. Мемлекеттік қолдауды пайдалана отырып, фармацевтика нарығындағы жамбылдық препараттар үлесін арттыруға жағдай жасау қажеттігіне айрықша көңіл бөлінуде.
