Шымкент қаласының тұрғындары мен қонақтарына бүгін «Арбат» демалыс аймағында құқық қорғаушылар кеңестерін беруде. «Нұр Отан» партиясы мен Әл-Фараби ауданы әкімдігі және қалалық Адвокаттар алқасы бірлесе ұйымдастырған «Адвокат кеңес береді» акциясы сағат 10:00-де басталған, 20:00-ге дейін жалғасады.
– «ҚР Адвокаттық қызмет және заң көмегі туралы» Заңының 19-бабында кешенді әлеуметтік қызмет көрсету деген тармағы бар. Яғни, соғыс ардагерлері, І, ІІ топтағы мүгедектер, көпбалалы отбасы мүшелеріне тегін заңгерлік көмек көрсетуіміз тиіс. Қарапайым халық өз құқықтары мен мүдделерін біле бермейді. Осы олқылықтың орнын толтыру үшін біз теңізге құйған тамшыдай болса да үлес қоссақ дейміз, – дейді Шымкент қалалық Адвокаттар алқасының төрағасы Серік Баймұратов.
Тегін заңгерлік кеңес алуға келген тұрғынның бірі Алма Әліпбаева мұрагерлік мәселесі бойынша кеңес алғанын айтады.
– Отағасы қайтыс болған. Балаларым "үйді осы бастан біздің атымызға жазыңыз" деген соң адвокатпен кеңестім. Көкейімдегі сұраққа жауап алдым, – деді қала тұрғыны.