Шымкент қаласында өткен «Жастықтың жалауы – Шымқала» атты жас ақындар айтысы аяқталды. Жастар жылы мен Қазақстан Республикасының Конституциясы мерекесінне арналған дүбірлі додаға Шымкент қаласы, Түркістан, Алматы, Жамбыл, Қызылорда облыстарымен бірге көршілес Өзбекстан Республикасынан жалпы саны 12 жас ақын қатысып, сынға түсті.
Әділқазылар алқасы шешімімен бас жүлдені шымкенттік жас ақын Қажымұхан Абзалов жеңіп алды. Ұлттық өнерді арнайы келіп тамашалаған, қатысушыларға сәттілік тілеген Шымкент қаласының әкімі бас жүлде иесіне қаржылай 1 миллион теңге мен арнайы диплом табыстады.
Айтыстың қорытындысында І орынға тағайындалған 700 мың теңге Түркістан облысының жас ақыны Нұрмахан Жақыпбекке табысталды. ІІ орынға лайық деп танылған астаналық ақын Аян Ниязбек 300 мың теңгені иеленді. Ал, жас айтыскерлердің үздік үштігін қорытындылаған Алматы облысының ақыны Сырым Әуесханға 200 мың теңге бұйырды.
Сонымен қатар, барлық қатысушы жас ақындар 100 мың теңге көлеміндегі қаржылай сыйлықпен және қала әкімінің арнайы дипломымен марапатталды.