Шымкентте атаулы әлеуметтік көмекке құжатты онлайн рәсімдеуге жүгінгендер қатары көбейген. Қалалық жұмыспен қамту орталығының мәліметінше, бір айда шамамен 7 мыңдай өтініш электрондық үкімет порталы арқылы тапсырылады екен. Бұл елімізде жүзеге асып отырған «Цифрлық Қазақстан» бағдарламасы арқылы мүмкін болып отыр.
Мамандар аз қамтылған азаматтар мен көпбалалы отбасылар құжаттарын Egov.kz сайты арқылы тапсыра алады дейді. Өтініштерін қашықтан тапсырулары үшін электронды цифрлық қолтаңбалары (ЭЦҚ) болуы керек. Бұл тұрғындарға өте ыңғайлы әрі орталыққа келіп әуре болмайды.
Жалпы, атаулы әлеуметтік көмек – бұл мемлекеттен уақытша қаржылай қолдау. Демек, табысы төмен азаматтарға төленеді. Қазақстанда атаулы әлеуметтік көмек екі санатқа бөлінеді: шартсыз және шартты. Шартсыз алушылар – бұл еңбекке қабілетті отбасы мүшелері жоқ отбасылар. Шартты санатына еңбекке қабілетті мүшелері бар отбасылар кіреді.
Көп жағдайда атаулы әлеуметтік көмекке жұмыс істеп жүрген азаматтар да өтініш тапсырады. Ондай жағдайда кіріс табысы ескеріліп, кедейшілік шегінің 70 пайызынан асқан жағдайда бас тартылады. Жұмыссыз жүрген азаматтарға қалалық жұмыспен қамту орталығы тарапынан «Жұмыспен қамтудың» белсенді шараларына қатысу ұсынылуда.