Түркістан облысындағы мал басына қажетті 3,9 млн тонна жем-шөп қоры 100 пайыз жиналды. Бұл туралы Түркістан облысының әкімі Өмірзақ Шөкеев Ордабасы ауданына арнайы жұмыс сапарында айтылды.
Егістікті әртараптандыру нәтижесінде өнім көлемін едәуір арттырып, 4 млн тоннадан асыру көзделген. Биылғы қуаңшылыққа қарамастан өңірдегі агросектордың жұмысы жемісті. Осы бағыттағы жұмыстармен танысу үшін облыс басшысы Ордабасы ауданыны ат басын тіреді.
Өңір басшысы алдымен Бөген ауыл округіндегі «Мұрат» шаруа қожалығының жоңышқа мен жүгері алқабын аралап көрді. Шаруалар жоңышқаның әр орымынан (1 гектар) 200 мың теңгеден астам пайда беретінін, дәнді дақылдың биылғы түсімінің де табысты болатынын болжады.
Ордабасы ауданының жеміс-жидек, бау-бақша өнімдерін қыстан қалай аман алып шығамын, – деп алаңдамайтын болды. Себебі, өңірдегі ауыл шаруашылық саласындағы көшбасшы мекеме – «Александровский сад» ЖШС-нің көкөніс сақтау қоймасы іске қосылуда. Жалпы құны 0,8 миллиард теңгелік жоба тек аудан тұрғындары ғана емес өңір шаруаларының да қажеттілігін қамтамасыз ете алмақ. Жобаға «ҚазАгроҚаржы» АҚ арқылы 624 миллион теңге, ал кәсіпкер есебінен 200 миллион теңге жұмсалған. Қойма Ресей мен Қытай технологиясымен жабдықталған. Мұнда 1500 тоннаға дейін дайын өнім сақтауға болады. Бірегей жоба үшінші тоқсанда іске қосылады деп жоспарлануда.
Кәсіпорын директоры жаңа жобаның мүмкіндіктері мен өндіріс көлемін ұлғайту туралы жоспарларымен бөлісті.