«Үздік жас мұғалім» байқауының жеңімпаздары марапатталды


5d97220a54b5e.jpg


Түркістан облысында Ұстаздар күніне орай өткен шара барасында өңір басшысы Өмірзақ Шөкеев алдағы уақытта «Дарын» мектептерін көбейтуді қолға алғанын мәлім етті. Қараша айында «Дарын» ғылыми – әдістемелік орталығы, 2020 жылы «Оқушылар сарайы» ашылады. 

-Замануи білім ошақтары бой көтеріп, оқушылардың білімге деген құштарлығын арттыруға барлық жағдай жасалады,-деді Өмірзақ Естайұлы. 

 Салтанатты шараға өңірдің білім беру саласында еңбек ететін 400-ден астам өкіл қатысты. Ұрпақ тәрбиелеуде талмай еңбек етіп жүрген ұстаздардың төл мерекесіне арналған «Мерекелеріңізбен, ұлағатты ұстаздар!» атты шараның шымылдығы «Абай өсиеті» театрлық көрінісімен ашылды. Өмірзақ Шөкеев ұстаздар қауымына өз алғысын білдіріп, мерекесімен құттықтады. Аймақ басшысы тұлға болып қалыптасуға ықпал еткен мектеп мұғалімдерін еске алып, оларға деген жылы лебізін білдірді. Елдің ертеңін айқындайтын, оның бәсекелестік қабілетіне ықпал ететін аса маңызды сала майталмандары Түркістан облысы әкімінің «Құрмет грамотасы», Алғыс хатымен марапатталды. Шәкірттерін білім нәрімен сусындатып, жақсы қасиеттерді бойына дарытатын ұстаздарға деген халқымыздың құрметі қашанда ерекше. Жиында «Жастар жылына» орай өткен «Үздік жас мұғалім-2019» облыстық байқауыныңжеңімпаздары марапатталды.

Түркістан облысы әкімдігі баспасөз қызметінің хабарлауынша, бүгінде облыста 60 мыңға жуық педагог еңбек етіп келеді. Былтырғы жылы өңіріміздің 150-ге жуық оқушысы халықаралық және республикалық деңгейдегі білім сайыстарында жүлделі орындарға ие болды. Жақында ғана «Үздік педагог-2019» республикалық байқауына өңірімізден 9 ұстаз қатысып, үшеуі білім сайысының озығы атанды.Елімізде ұстаздар қауымының төл мерекесі қазан айының алғашқы жексенбісінде атап өтіледі. Салтанатты рәсім әрі қарай ән-күймен, би шашуларымен және театрланған қойылымдармен жалғасты.


®RG media - ақпараттық агенттігі
Бөлісу тақырыбы: «Үздік жас мұғалім» байқауының жеңімпаздары марапатталды