Сайрам ауданында «Қарапайым заттар экономикасы» бағдарламасы аясында қаржыландырылып отырған кәсіпорындар қатары жылдан жылға артып келеді.
«Қарапайым заттар экономикасы» бағдарламасы аясында 2019 жылы 13 жоба, ал биылғы жылдың 6 айында 3 жоба бюджет есебінен қаржыландырылған. Бұл бағыттағы жұмыстар тұрақты жалғасуда, биылғы жылға бағдарламаға 20 жобаны қатыстыру жоспарланған.
Сондай-ақ, жұмыс істеп тұрған шағын және орта кәсіпкерлік субъектілерінің саны 15189 бірлікті құрап, кәсіпкерлік субъектілерімен 36,5 млрд теңгеге өнім өндіріліп (2019ж.- 29,2 млрд теңге), өсім 25%-ға жетіп отыр. Бұл салада 22,8 мың адам жұмыспен қамтылған.
Ауданға жыл басынан 11,0 млрд теңге инвестиция тартылды. Оның ішінде 63%-ы бюджеттік емес инвестиция. Облыста бұл бағытта Сайрам ауданы үлес бойынша 3 орында.
Айта кетейік, аталған бағдарламаға шағын және орта бизнес субъектілері де, ірі бизнес өкілдері де қатыса алады. «Қарапайым заттар экономикасы» негізінен 2 бағыттан тұрады. Бірінші – кәсіпкерлік субьектілеріне жеңілдетілген несие бөлу, екіншісі – жоғарыда аталған өнеркәсіп салаларын дамыту. Жеңілдетілген несие бойынша банктер кәсіпкерлерге 10 жылға дейін 15 пайызбен несие беріп, оның 9 пайызы «Даму» қоры арқылы субсидияланады. Ал, агроөнеркәсіптік кешендегі өндіру бойынша оның 10 проценті ауыл шаруашылығы басқармасы арқылы субсидияланады. Сонда іс жүзінде кәсіпкерлер несиені 6 және 5 пайызбен өтейді.