Шымкентте "Art Clay" қолөнер орталығының лентасы қиылып, салтанатты ашылу рәсімі өтті. Мұнда ұлы даланың ұлы мұрасын үйрене отырып қол маторикасын дамытуға болады. Саз балшықты илеп, қалаған пішінде өз туындыңызды шығара аласыз. Қазіргі таңда мегаполисте мұндай типтегі орталықтар жоқтың қасы. 22 жасында өз қаржысына кәсібін ашып, нәсібін тауып отырған Наурызбай Оразбайдың әрекеті құптарлық.
Өнер орталығының табалдырығын аттаған сәттен бастап ұлттық мұрамыздың қайталанбас нақыштары көрнекілігімен көз тартып, адамды баурап алады. Наурызбай Оразбайдың өнердегі ұстазы оңтүстік өңірінің атақты суретшісі Әділхан Маликов. Жас өренді өнерге баулып шығармашылығын шыңдауға сеп болған қылқалам шебері шәкіртінің бүгінгі жетістігіне дән риза. "Наурызбай бүгінге дейін өзінің өнерін шыңдаумен келе жатыр. Ол қазақтың көне Отырардағы қыш құмыраларды қайта тірілтуі одан кейін қазақтың салт дәстүрлерін елеусіз жібермей, өзі білгенін өзгеге де үйретуі құптарлық іс. Туындыларынан Отанына, еліне, жақындарына деген махаббаты көрініп тұр",- дейді ұстазы.
Орталыққа қойылған картиналар өнерлі жігіттің төл туындылары. Ал дизайны анасының идесы екен. "Наурызбай бала күнінен менімен бірге сурет салып, осы өнерге қызығушылығы жоғары екенін байқатқан бала. Жарыстарға қатысып, жүлделі орындарды да иеленіп жүрді. Мен ұлымнан көп үміт күтемін. Жеке өзінің кәсібін ашып отыр. Біз қолдау көрсеттік" дейді анасы Ұлжан.
Мұнда бір күндік және бір айлық шенберлік сыныптары іске қосылған. Көп балалы аналарға жеңілдіктер қарастырылыпты. "Шымкент қаласында құмыра жасау өнері әсте-әсте дамып келеді. Сондықтан қызығушылар көбеюде. Халыққа кеңінен таныла қоймаған ұлы дала өнерін жұртшылыққа паше ету, жастарды баулу мақсатында осы істі қолға алдым",- дейді Наурызбай.