Бүгін Шымкент қаласындағы «Қызғалдақ» сарайында «Ұстаз – ұлттың шамшырағы» атты салтанатты жиын өтті. Ел болашағын тәрбиелеу жолында аянбай қызмет етіп жүрген педагогтарға құрмет көрсетуге арналған бұл мерекелік іс-шара ұстаздар қауымының мәртебесін айшықтап, олардың еңбегіне деген шынайы ризашылықтың көрінісіне айналды.
Жиынға қала әкімі Ғабит Сыздықбеков, қалалық мәслихаттың төрағасы Бахадыр Нарымбетов, аудан әкімдері, басқарма басшылары, жоғары оқу орындарының ректорлары, техникалық және кәсіптік білім беру ұйымдарының жетекшілері, ардагер ұстаздар мен 2000-нан астам педагог қатысты. Зал толы тағзым мен алғысқа лайық жандардың жүзінен қуаныш пен толқу қатар сезілді.
Мерекеде ҚР Оқу-ағарту министрлігінің мемлекеттік наградалары табысталды. Шымкент қаласының төрт ұстазы «Ерен еңбегі үшін» төсбелгісін иеленсе, сондай-ақ бірқатар мұғалімдер «Ы. Алтынсарин» төсбелгісімен, «Білім беру ісінің құрметті қызметкері» төсбелгісімен, қала әкімі мен қалалық мәслихат төрағасының Алғыс хаттарымен марапатталды. Әр марапат – жылдар бойғы маңдай тер мен адал қызметтің жемісі.
Қала әкімі Ғабит Сыздықбеков өз сөзінде ұстаздық мамандықтың қоғамдағы орны мен жауапкершілігін ерекше атап өтті.
— Ел Президенті Қасым-Жомарт Кемелұлы Тоқаев айтқандай, ұстаздық жай ғана мамандық емес, бұл — ұлы миссия. Өйткені, адам қандай жетістікке жетіп, биікке шықса да, ұстазының алдында өмір бойы шәкірт болып қалады. Ұстаз – ұлт болашағының шамшырағы. Ол — адам өміріндегі ең қадірлі тұлға. Сіздер жас ұрпақты білімді, парасатты, Отаншыл әрі адал азамат етіп тәрбиелеу жолында тынымсыз еңбек етіп келесіздер. Мұғалім мемлекеттің ең басты байлығы – адами капиталды қалыптастырады. Сондықтан ұстаздың мәртебесін көтеру – мемлекетіміздің басты міндеттерінің бірі. Қазір мұғалімдердің әлеуметтік жағдайын жақсартуға, кәсіби біліктілігін арттыруға арналған нақты қадамдар жасалып жатыр. Бұл бағытта Шымкент қаласында да жүйелі жұмыстар жүргізілуде. Бүгінде қаламызда 32 мыңнан аса педагог еңбек етеді. Олардың кәсіби шеберлігі мен ерен еңбегі мемлекет тарапынан жоғары бағалануда. Биыл Шымкентте төрт ұстаздың «Ерен еңбегі үшін» төсбелгісіне ие болуы – мұғалім мамандығының беделін арттырып, кейінгі буынға үлгі болатыны сөзсіз, – деді қала әкімі.
Салтанатты жиын әсерлі концерттік бағдарламаға ұласты. Ән мен күй, жүрекке жылы жолданған лебіздер мен құттықтаулар ұстаздарға деген халықтың құрметін айқын сездірді. Бұл күн – педагогтер үшін қуаныш қана емес, еңбектің еленуі мен болашаққа деген сенімді нығайтатын ерекше сәт болды.
Жиын жас ұрпаққа ұстазды құрметтеу – ұлттық тәрбиенің алтын арқауы екенін ұғындырды. Шымкент ұстаздарына көрсетілген ықылас – олардың ел дамуына қосқан өлшеусіз үлесіне деген алғыстың белгісі, қоғамның рухани тірегіне берілген адал бағасы.
