Үшінші мегаполисте бүгіннен бастап бірнеше нысан өз жұмысын бастады. Олардың арасында тамақтану орындары да бар. Енді қатаң тексеріс мен сақтық шараларын ұстана отырып, олар белгілі бір уақыт аралығында жұмыс істейтін болады.
Шымкент қаласының бас санитар дәрігері Әбдіманап Төлебаев 28-мамырдан бастап, жұмысын бастауға рұқсат берілген орындарды мәлімдеді.
-Қалада індеттің таралуы әлі төмендеген жоқ. Керісінше, күн сайын жоғарылап келеді. Сондықтанда санитарлық талаптар қатаң бақылауда болады,- дейді дәрігер.
Тамақтану орындарына өз жұмысын бастауға рұқсат берілді. Дегенмен қатаң талапты орындаса ғана. Дәмханалар таңғы 10:00 мен 18:00 аралығында жұмыс істейді.
Тамақтанушылар арасында арақашықтық сақталуы керек. Есік алдында арнайы қызметкер келушілердің қызуын өлшеп, қал-жағдайына зер салуы тиіс.
Сонымен қатар, тамақтан бір реттік ыдыстармен немесе көп реттік ыдыстар залалсыздандырылып отыруы тиіс. Ал, жұмысшылар міндетті түрде бетперде мен бір реттік қолғаптармен қамтамасыз етілуі керек.
Жазғы алаңдар мен спорт алаңдары және базарларда осы сынды талаптарды орындай отырып, өз жұмыстарын бастауға рұқсат берілді.