Келес АПБ-ның 102 кезекші бөліміне Абай ауылы көшелерінің бірінде орналасқан банкоматтың бейнеэкранын белгісіз біреу түнгі уақытта сындырып кеткені жөнінде арыз келіп түсті. Аталған жайт ҚР ҚК-нің 293-бабы «Бұзақылық» бойынша тіркеуге алынып, полицейлер бірден іске кірісті.
Қоғамдық орында бұзақылық жасаған күдіктіні ұстау мақсатында тәртіп сақшылары жан-жақты тексеру жұмыстарын жүргізді. Бейнебақылау камераларын қарап, сол күні түнде келген күдікті адамдар мен көліктердің тізімі алынды. 2 тәулік қатарынан үздіксіз іздестіру жұмыстары жасалды. 10 шақты көліктің иелері тексеріліп, соның ішінен осы теріс әрекетті жасаған күдікті анықталды. Полицейлер оны өз үйінен ұстап, Келес АПБ-ға жеткізді. Ол жергілікті тұрғын болып шықты.
Белгілі болғандай, күдікті түнгі уақытта банкоматтан ақша шешуге келіп, аппарат банкомат карточкасын қабылдамағаннан кейін, ашуға ерік беріп банкоматтың экранын сындырған. Содан кейін оқиға орнынан бой тасалап кеткен. Алайда кәсіби шеберлігі мол келестік полицейлердің тындырымды тірлігі нәтижесінде, бұзақы ізін суытпай құрықталып отыр.
Түркістан облысының полицейлері әрбір азаматқа бұзақылық жасамау, қоғамдық тыныштықты сақтау міндет етілетінін ескертеді. Сондықтан қоғамдық тәртіпті сақтап жүрейік!
ТО ПД-ның баспасөз қызметі
