Арыс қаласында сағат 22:00-ге дейін жұмыс жасаған кафенің иесі жауапқа тартылды. Бұл туралы RGMEDIA.KZ ақпарат агенттігі Түркістан облысы Полиция департаментінің баспасөз қызметіне сілтеме жасап хабарлады.
Короновирустың таралуына жол бермей, алдын алуға бағытталған рейдтік іс-шаралар барысында Арыс АПБ-нің қызметкерлері бірнеше заңбұзушылықтарды анықтап, шара көрілді. Полицейлері түнгі уақытта туған күн, кішігірім отырыстар болатын кафе-барларды тексеріп, олқылықтарды байқады. Соның бірі – Арыс қаласындағы белгілі сауда орталығында орналасқан кафенің сағат 22:00-ден кейін жұмыс істеп, тұрғындарға қызмет көрсетіп отырғаны белгілі болды. Аталған жайтқа байланысты Арыс аудандық полиция бөлімінің полицейлері Қазақстан Республикасы Әкімшілік құқықбұзушылық Кодексінің 476-бабы «Төтенше жағдай режимін бұзу» бойынша хаттамалар толтырды.
Мемлекет басшысының қаулысымен елімізде енгізілген төтенше жағдайға байланысты Түркістан облысының полицейлері күшейтілген режимде жұмыстарды жүргізуде. Соның арқасында тәртіп сақшылары төтенше жағдай режимін бұзудың 70-ден астам жайтын анықтаған. Құқықбұзушыларға 10 АЕК көлемінде айыппұл салынып, 17-сі әкімшілік қамауға алынған. Полицейлер облыс тұрғындарына ескертеді, төтенше жағдай кезінде заң талаптарына сәйкес әрекет етіп, мүмкіндігінше сақтық шараларын жасаңыздар.