Үйге кезекке тұру үшін енді бума-бума қағаз жинап, арнайы мекемеге барудың қажеті жоқ. Себебі мұны онлайн жасауға болады. "Отбасы банкі" 24 мамырдан бастап баспанаға мұқтаж азаматтар үшін жаңа электрондық жүйесін іске қосты деп хабарлайды RGmedia.kz тілшісі.
Оrken.otbasybank.kz порталы арқылы қазақстандықтар енді онлайн форматта тұрғын үй есебіне тұра алады. Ол үшін ЭЦҚ болуы қажет. Кезекке тұрудың басты шарттары өтініш беруші 18 жасқа толған болуы және өтініш берушінің немесе отбасы мүшелерінің соңғы 5 жылда меншігінде тұрғын болмауы шарт. Егер жүйе сіздің талаптарға сай келгеніңізді тексеріп, шарттарға сәйкес болса сіз тұрғын үйге мұқтаждар есебіне енгізілесіз. Сіздің өтінішіңізді мамандар 1-3 жұмыс күн ішінде қарап береді. Бұл жүйе уақыт үнемдеуге және қағазбастылықтан арылуға жол ашпақ.