Алматы қаласының су жаңа әкімі Дархан Сатыбалды Instagram желісіндегі парақшасында алматылықтарды бірігіп жұмыс істеуге шақырды деп хабарлайды RGmedia.kz тілшісі.
"Президент Қасым-Жомарт Кемелұлы қаламыздың болашағына қатысты бірқатар маңызды тапсырма жүктеді. Тұрақты экономикалық өсімге қол жеткізу, қаланың инфрақұрылымын кешенді жаңғырту, жол-көлік жүйесін жақсарту, экологиялық мәселелерді шешу мен экономиканы әртараптандыру — алдағы жұмысымыздың басты бағыттары болмақ.
Алматы — арман мен мүмкіндіктер мекені. Бұл шаһарға шынайы жанашырлықпен, тың серпінмен, нақты іспен қызмет ету — мен үшін үлкен мәртебе. Бір жағадан бас, бір жеңнен қол шығарып, бірігіп, тізе қосып еңбек етсек, ару қаламызды одан әрі көркейте аламыз. Әсем Алматының әрбір көшесі мен әр тұрғыны үшін нақты өзгерістер жасау, аянбай қызмет ету — біздің басты міндетіміз, — делінген әкім жазбасында.