Павлодар облысының әкімдігінде жаңа тағайындалулар орын алды. Енді облыс әкімінің инвестиция, өндіріс және кәсіпкерлік мәселелері бойынша орынбасары Қайрат Нүкенов болды. Ал облыс басшысының ауыл шаруашылығы саласына жауапты орынбасары ретінде Рүстем Құрманов тағайындалды. Бұл туралы облыстық әкімдіктің ресми сайты хабарлайды.
Павлодар облысының әкімі жиналыс барысында өз әріптестеріне жаңа орынбасарларын таныстырып өтті. Олар басқа жұмысқа ауысқан Жайық Шарабасов пен Дәурен Махажановтың орнына келді.
Енді Қайрат Нүкенов облыстың инвестиция, өндіріс және кәсіпкерлік мәселелеріне жауап беретін болады. Рүстем Құрманов болса, акгроөнеркәсіптік комплекс саласында қызмет етеді.
Бұл тағайындалуға дейін Қайрат Нүкенов Түркістан облысы әкімінің бірінші орынбасары болып жұмыс істеген. Рүстем Құрманов орынбасар болмай тұрып, "ҚазАгро" ұлттық басқару холдингінің басшысы болып қызмет еткен.