Әкімдер жұмыс орындарының қысқаруына мониторинг жасап отыруы тиіс. Бұл туралы Премьер-Министрінің орынбасары Гүлшара Әбдіқалықова Үкіметтің еңбек қатынастарын реттеу жайы қаралған отырысында айтты.
– Облыс әкімдеріне айтатын мәселе – жұмыс орындарының қысқаруын ары қарай бақылап, мониторинг жасап отыру қажет. Қысқарған жағдайда жұмысқа тұрғызу мәселесін қарау міндеті тұр. Сонымен қатар, айлық табыс бойынша қарыздың ары қарай көтерілмеуіне және бар қарызды жабу мәселесіне баса көңіл аударуларыңызды сұраймын, – деді Үкімет басшысының орынбасары.
Гүлшара Әбдіқалықова Үкімет отырысында еңбек қатынастарын реттеу, өндірістік қауіпсіздік жақсарту мәселелеріне қатысты айтылған ұсыныстар ағымдағы жылдың екінші тоқсанында Қарағанды қаласында өтетін үшжақты комиссияда қаралатынын жеткізді.
Ал, Еңбек және халықты әлеуметтік қорғау министрі Бердібек Сапарбаев кәсіпорындар қызметкерлеріне 1 млрд 700 млн теңге жалақы қарыз екенін айтты. Оның ойынша, кәсіпорындағы жалақы жыл сайын инфляция деңгейінде көбейіп отыруы қажет.