Мемлекет басшысы Н.Назарбаевтың халыққа арнаған Жолдауларында ауыл шаруашылығы саласы – ел қазынасының бүйірін қампайтатын негізгі сала болу керектігі жөнінде көп айтылды. Осыған орай, ауыл шаруашылығын өркендету жолында көптеген жұмыстар атқарылып келеді.
Түркістан облысында «Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған» бағдарламасы аясында 300-ден астам кәсіпкерге несие берілген. Жалпы, осынау жұмыстарға 2018 жылға 3,282 млрд теңге қаржы қаралып, несиелендіру жұмыстары жүргізілуде.
2018 жылдың І жарты жылдығында атқарылған жұмыстардың ішінде «Ауыл шаруашылығын қаржылай қолдау қоры» АҚ-ы облыстық филиалы арқылы 260 тұлғаны несиелендірілсе (1 122,5 мың теңге), оның 184 бірлігі мал шаруашылығына қатысты кәсіп түрі болып табылады. 6 пайыздық үстемесімен 7 жыл мерзімге берілген өзге де бірліктер жылыжай, жиһаз өндірісі және шаштараз кәсіпшілігіне байланысты істер болып отыр. «Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған» бағдарламасын іске асырудың екінші тармағы - «Аграрлық несие корпорациясы» АҚ-ы арқылы 64 тұлғаға (201 652 мың теңге) 6 пайызбен 7 жыл мерзімге несие беріліпті. Оның 63 бірлігі мал шаруашылығына қатысты болса, 1-уі жылыжай өндірісіне тиесілі.
Одан бөлек, нәтижелі жұмыспен қамту, жаппай кәсіпкерлікті және кооперативтерді дамытуға республикалық бюджеттен қосымша 3 млрд. теңгеге бюджеттік өтінім беріліп, оның 1,8 млрд. теңгесі қолдау тапқан.