Қазақ қашаннан қонақжай халық емес пе? Әрқашан бауырларымен барымен бөлісіп, жоғын жасырып отырған. «Бір нанды бөлісіп жеген», «Өле жегенше, бөле же», "сыйға сый, сыраға бал" деген сөздер осыдан қалса керек.
Мінекей, осыған орай биыл қыркүйек айының 22-23 күндері Түркістан облысының тауарөндірушілері Елордада ауыл шаруашылығы өнімдерінің кезекті жәрмеңкесін өткізбек. Астана қаласының 20 жылдық мерекесіне орай ұйымдастырылып отырған шараға жалпы құны 201 млн. теңгені құрайтын 496 тонна ауыл шаруашылығы өнімдері ұсынылмақ. Бұл жөнінде облыс әкімінің баспасөз қызметі хабарлайды.
Оның ішінде 80 тонна ет және ет өнімдері, 141 тонна көкөніс, 28 тонна сүт және 90 тонна бақша өнімдері, 53 тонна жеміс-жидек, 26 тонна картоп жөнелтіледі. Сондай-ақ, 10 мың дана жұмыртқа және 5 тонна балық, 4 тонна әсел, 10 тонна кептірілген жеміс, 14 тонна түрлі консервілер және 45 тонна басқа да өнімдер бар.
Облыстық ауыл шаруашылығы басқармасы басшысының міндетін уақытша атқарушы Нұрбек Бадырақовтың айтуынша, жәрмеңкедегі тауарлар базар нарқынан 10-15 пайыз төмен бағада сатылатын болады.
– Отандық өнімдеріміз қала тұрғындары мен қонақтарына жәрмеңке арқылы ұсынылады. Түркістан облысы Астана қаласының 20 жылдық мерекесі аясында осымен 4-ші рет жәрмеңке өткізіп отыр. Осы аралықта Елордаға 14 753 тоннаны құрайтын ауыл шаруашылығы өнімдерінің 28 түрін жөнелтілді. Осы шараны өткізуге өңіріміздің 35 ірі және қосалқы шаруа қожалықтары мен кәсіпорындары атсалысуда, – деді Нұрбек Бадырақов.
Елордалық тұрғындар Түркістан өңірінің жылы-жұмсақ тағамдарымен дәмденетін күн алыс емес.