Президент тапсырмасына сәйкес аудан әкімдері халық алдында есеп беру жиындары жалғасын табуда. Сарыағаш ауданы әкімінің міндетін уақытша атқарушы Мұрат Байгабулов Жібек жолы ауылында ауыл тұрғындарымен кездесіп, Мемлекет басшысы Қасым-Жомарт Тоқаевтың биылғы Жолдауында айтылған тоғыз бағыт бойынша қысқаша таныстырып өтті. 

Осыдан кейін ауданда 9 айда атқарылған жұмыстардың барысымен таныстырып, алдағы уақытта іске асырылатын жоспарларды атап өтті.

Мұрат Байгабуловтың айтуынша, Жібек жолы ауылдық округін дамыту жоспарына сәйкес  ауылдық округте  орналасқан  көпқабатты тұрғын үйлердің кәріз жүйесі қалпына келтірілген. Сондай-ақ, ауылдық округтегі «Жібек жолы» кеден бекетінің маңын көркейту мақсатында «керуен» архитектуралық нысаны, сонымен қатар кеден бекеті маңына сергек бейнекамерасы орнатылғанын айтты. Бұдан бөлек, ауылдық округке қарасты Дихан баба елді мекеніндегі саябақты қалпына келтіру жұмыстары жүргізілген. Жібек жолы ауылдық округ арқылы өтетін облыстық  Х-52 жол бойына аяқжол салынып, Диқан баба елді мекеніндегі 54 тармақ каналының 350 метріне бетондау жұмыстары жүргізілген.

- Президент Жолдауында айтылған тапсырмалар ауданның даму жоспарына сәйкес орындалуда. Мәселен, ауыл тұрғындарының  бос уақыттарын тиімді өткізу, салауатты өмір салтын насихаттау мақсатында  Жібек жолы ауылдық округіне қарасты Жібек жолы елді мекенінде спорт және  воркаут алаңшасы, Жаңақұрылыс және Зортөбе елді мекендерінде кіші футбол мен воркаут алаңшалары, сонымен қатар, Сарқырама және  Жаңатұрмыс елді мекенінде балалар ойын алаңшаларымен кіші футбол алаңшалары салынып, тұрғындар игілігіне пайдалануға берілді. Оған қоса, 2 балалар ойын алаңшаларының құрылыс жұмыстары жүргізілуде. 

Жаңатұрмыс елді мекенінде бір ауысымда 25 адамды қабылдайтын дәрігерлік амбулаторияның құрылыс жұмыстары аяқталып, өткен айында ел игілігіне табысталды. Сонымен қатар, Қарабау елді мекенінде фельдшерлік-акушерлік пункттің  құрылыс жұмыстары жүргізілуде, - дейді М.Байгабылов.

Сондай ақ Мұрат Байгабулов Жемісті ауылдық округіндегі тұрғындармен кездесіп, ауылдық округ бойынша  атқарылған жұмыстарды баяндап өтті. 

Атап айтқанда, ауылдық округке қарасты Жемісті және Тың елді мекендерінде 25 орындық дәрігерлік амбулаторияның құрылыс жұмыстары жүрігізіліп, тұрғындар игілігіне  пайдалануға берілген.  Аудан әкімдігінің қолдауымен Тың елді мекеніне «Билайн» ұялы байланыс операторы тарапынан  4 G жоғары жылдамдықтағы мобильді интернет  іске қосылған. Жемісті елді мекеніне қарасты көшелердегі тозығы жеткен жарық беру бағаналарымен жарықшамдары жаңартылып, 2 көшенің 3,1 шақырымына  орта  жөндеу жұмыстары  жүргізілген. Оған қоса, аталған елді мекендегі көпірге ағымдағы жөндеу жұмыстары жүргізіліп отыр. Тұрғындарды таза ауыз сумен қамтамасыз ету мақсатында Жемісті елді мекенінде  қосымша тереңдігі 950 метрді құрайтын ұңғыма қазылып, су шығарылды. 

Аудан әкімінің міндетін уақытша атқарушы Мұрат Байгабулов қос елдімекенде ауылдық округ тұрғындары қойған сұрақтарға жан-жақты мысалдармен келтіре отырып, заң аясында жауап берді. Соңынан қос ауылдық округте де ауыл тұрғындарын жеке сұрақтары бойынша қабылдау өткізді.