Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында барлық деңгейдегі әкімдерге әрдайым халықпен тығыз байланыста болуды тапсырды. 

Президент айтқандай бұл «Халық үніне құлақ асатын мемлекет» қағидасын орнықтыруға ықпал ететіні сөзсіз. Осы қағиданы орнықтыру барысында аудан әкімдері халықпен кездесулерін жалғастыруда. Кеше Сарыағаш ауданының әкімі Арман Абдуллаев Тегісшіл ауылдық округ тұрғындарымен кездесті. Ашық форматтағы  кездесуде аудан әкімі  алдыңғы өткен жүздесуде айтылған мәселелер бойынша өңірде атқарылған жұмыстар барысымен таныстырып, алдағы жылға белгіленген ауданның даму жоспарымен таныстырды.  

Оның айтуынша, биыл «Ауыл – ел бесігі» жобасы аясында Тегісшіл ауылдық округіне қарасты Тегісшіл, Таскескен, Мәдениет елді мекендерінде жалпы 28,6 шақырымды құрайтын 36 көшеге орташа жөндеу жұмыстары жүргізілген. Сонымен қатар Тегісшіл ауылындағы Ж.Арапов және Мәдениет ауылындағы Т.Байтұрұлы көшелеріне асфальт жабыны төселген. 

- Президент Жолдауында биыл елімізде болған су тасқынының алдын алу шараларын күшейтуді тапсырғаны белгілі. Осы ретте ауданда төтенше жағдайлардың алдын алу мақсатында Таскескен елді мекенінің қауіпсіздігін арттыру үшін ондағы жалпы ұзындығы 15,2 шақырымды құрайтын канал мен қашыртқылар механикалық тазалаудан өткізілді. Таскескен елді мекенінде орналасқан «Мәдениет» дәрігерлік емханасы алдынан жаңа  автотұрақтың құрылысы жүргізілді. Таза ауыз су мәселесі бойынша Мәдениет және Тегісшіл елді мекенінің таза ауыз су құбырлары «Сарыағаш ТСЖ» теңгеріміне өткізіліп, өз шешімін тапты. Таскескен елді мекеніндегі су ұңғымасының  су қысымын арттыру мақсатында жаңа сусорғы, ұңғыма қақпақтары орнатылды, Ауылдық округке қарасты Мағжан Жұмабаев пен С.Торайғыров атындағы жалпы орта мектебтерінің қазандықтары қатты отыннан көгілдір отынға ауыстырылды, - дейді аудан әкімі аудан бюджетінен атқарылған жұмыстарға тоқталып.

Жиын соңында ауыл тұрғындары аудан басшысына атқарылған жұмыстар бойынша оң баға беріп, ризашылықтарын жеткізді. Ауыл ақсақалдары Арман Айдарұлына өз баталарын беріп, алдағы жұмыстарына сәттілік тіледі. Кездесуден кейін өңір басшысы ауыл тұрғындарын жеке мәселелері бойынша қабылдап, әрбір мәселеге жеке тоқталып, жауапты сала басшыларына тапсымалар жүктеді. 

Кездесуден кейін аудан әкімі Арман Абдуллаев «Ауыл – ел бесігі» жобасы аясында Тегісшіл ауылдық округіне қарасты елді мекендер көшелеріне жүргізілген жолдардың жөндеу жұмыстарының сапасын бақылап қайтты. Мұндағы мердігер мекеме тарапынан аталған ауылдық округке қарасты Тегісшіл, Таскескен, Мәдениет елді мекендеріндегі 36 көшеге орта жөндеу жұмыстары жүргізілген. 

Құрылыс жұмыстарымен танысқан аудан басшысы  ауданның жолаушылар көлігі және автомобиль жолдары бөлімінің басшысы М.Доспуловқа жолдың сапасын мұқият тексеріп, анықталған кемшіліктер бойынша мердігер мекемеге орындалуын бақылауға алуды, сонымен қатар, жол активтері ұлттық сапа орталығына жөндеу жұмыстарының сапасы бойынша ұсыныс беруді жүктеді.