Президенттің «Халық үніне құлақ асатын мемлекет» жобасы аясында аудан және ауыл әкімдері ауыл тұрғындары алдындағы есеп беру жиындары жалғасын табуда. 

Сарыағаш ауданының әкімі Арман Абдуллаевтың тұрғындармен кездесуі Дарбаза ауылдық округінде жалғасын таты. Кездесуде аудан басшысы биыл аудан көлемінде атқарылған жұмыстарға тоқталып, алдағы жоспарларымен бөлісті. 

- Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында әкімдерге үлкен жауапкершілік артып отыр. Президентіміз: «Аймақ басшысы шаруашылықпен ғана айналыспайды. Әкім қоғамдық, рухани мәселелерді әрдайым назарда ұстауға тиіс. Әрбір басшы елмен етене жұмыс істеуі керек, тұрғындармен сенімді байланыс орнатуы қажет. Сонда жұрт та оның бастамаларын қолдайды, ел үшін пайдалы іске жұмыла кіріседі. Әкімнің абырой-беделі дегеніміз де – осы» деп біздің негізгі бағыт-бағдарымызды айқындап берді. Сондықтан да біздің бүгінгі кездесуіміздің мақсаты – сіздермен еркін пікір алмасып, маңызды мәселелерді талқылау. Ауданымыз туризм, ауыл шаруашылығы және кәсіпкерлікті дамыту саласында аса қарқынмен дамуда. Сонымен қатар, биыл аудан аумағында бірнеше әлеуметтік нысандардың құрылысы аяқталып, халық игілігіне берілді. Оған қоса, басқа нысандардың және инфрақұрылым саласы бойынша бірнеше  нысандардың құрылыс жұмыстары қарқынды жүруде, - деп атап өтті Арман Айдарұлы.

Биыл аталған ауылдық округте әлеуметтік нысандардың құрылыс жұмыстары аяқталып, пайдалануға берілген. Аудан әкімінің айтуынша, биыл Н.Әбдіров атындағы 200 орындық мектеп ғимаратының құрылыс жұмыстары аяқталып, Сарысу елді мекенінің тұрғындары жаңа оқу жылында жаңа ғимараттан бастаған. Сондай-ақ Ердәуіт елді мекеніндегі спорт алаңшасының  құрылыс жұмысы, Құрысай елді мекеніндегі №63 бастауыш мектеп ғимараты ағымдағы жөндеуден өткізілген.  

Мұнда Президент Жолдауында тапсырғандай жол-көлік логистикасында атқарылған құрылыс жұмыстары да баршылық. Атап айтар болсақ, аудандық маңызы бар 51 разъезд жолына орта жөндеу жұмыстары жүргізіліп, 2,9 шақырымына асфальт жабыны төселіп, Құрысай елді мекеніндегі Ынтымақ көшесі ағымдағы жөндеуден өткен. Сондай-ақ Құрысайда «Билайн» ұялы байланыс операторы тарапынан 4 G жоғары жылдамдықтағы базалық станциясы орнатылған. 

- Мемлекет басшысы Жолдауында инвесторлардың демеушілігімен спорт, мәдениет пен денсаулық, білім нысандарын салуды ұйымдастыруды әкімдерге жүктеген болатын. Осы бағытта бұл округте де атқарылып жатқан жұмыстар бар. Атап айтар болсақ, бұқаралық спорт түрлерін дамыту, ауыл тұрғындарының бос уақытын тиімді пайдалану мақсатында Дарбаза елді мекенінде жеке кәсіпкер Б.Салимов тарапынан 500 орындық спорт кешенінің құрылыс жұмыстары жүргізілді. Сондай-ақ, демеушілер есебінен Сарысу елді мекенінде мал тоғытатын орын (купка) қоршалды. Дарбаза ауылдық округін абаттандыру, көркейту мақсатында  демеушілер есебінен ауқымды жұмыстар атқаруылуда. Атап айтқанда, Сарыағаш ауданының құрметті азаматы Е.Төребеков және аудандық мәслихат депутаты Ж.Қосалиевтердің тарапынан ауылдық округтің кіреберіс аумағына ағаштар отырғызу, қоршау, көгалдандыру жұмыстары жүргізілуде, - дейді аудан әкімі. 

Бұдан бөлек, Дарбаза ауылдық округіне қарасты Ердәуіт, 51-разъезд  елді мекендерін табиғи газбен қамтамасыз ету мақсатында құрылыс-монтаж жұмыстары жүргізілуде. Сонымен қатар, Ердәуітауылында орналасқан су қоймасының 6 су тазартқыш сүзгілері жаңартылып, Дарбаза елді мекеніне қарасты екі көшесінің су құбырларын жаңарту мақсатында жобалық-сметалық құжаттамасы әзірленуде.

Кездесуде әрбір тұрғынның мәселесі маңызды екенін айтқан аудан басшысы әрбір ұсыныс пен өтініш хаттамаға енгізіліп, тиісті жұмыс жүретінін айтты. 

Аудан әкімі Арман Абдуллаев Дарбаза ауылдық округ тұрғындарымен кездесуден кейін  Дарбаза елді мекеніндегі Бейбітшілік көшесінің бойында құрылыс жұмыстары жүргізіліп жатқан балалар ойын алаңшасының жұмысымен танысты. Мердігер мекеме тарапынан балалар ойын алаңшасына түрлі ойын элементтері және сырғанақ, әткеншек, орындықтар орнатылып, балалардың қауіпсіздігі үшін қоршау жұмыстары жүргізілген. Сондай-ақ, балалар ойын алаңшасының аумағына кіші футбол алаңшасы салынып, айналасы абаттандыру мақсатында бір гектар алаң қоршалып, ағаш көшеттері отырғызылған. Тамшылатып ылғалдандыру жүйесі енгізілген. Жалпы онда ауыл тұрғындарының бос уақытын тиімді өткізу үшін барлық қолайлы жағдай жасалған. Сондай-ақ аудан басшысы округ аумағында жүзеге асырылып жатқан басқа да жобалардың құрылыс жұмыстарымен танысып, жауапты мекемелерге тиісті тапсырмалар берді. Құрылыс жұмыстарын мерзімінде аяқтауды тапсырды.