Инвесторлардың жеке қаржысы есебінен салынып, ел игілігі үшін жұмыс істеп жатқан нысандар Түркістан облысында баршылық. Соның бірі – Төлеби ауданы Ленгір қаласында жұмыс істеп тұрған медициналық колледж. 

Ол колледжге жеке кәсіпкер Аманкүл Мейірханқызы өз қаражатын салып, 2012 жылы «Мейір Бейс» жоғары медицина колледжін ашқан болатын. 

Бүгінде «Мейір-Бейс» медициналық жоғары колледжінің тәжірибелі ұстаздары жыл сайын сапалы біліммен қаруланған медицина қызметкерлерін дайындап шығаруда. Медициналық біліммен қатар ғылыми, шығармашылық жұмыстармен айналысатын студенттер халықаралық, республикалық, облыстық байқауларда топ жарып жүр. Ғылыми жобаларын сәтті қорғап, ұстаздарының үкілеген үмітін ақтаған қаншама жас жеткіншек бүгінде жоғары білімін жалғастырып жатса, колледж тәмамдағандары жұмысқа орналасып, белді медицина маманы атанған. 

Қазіргі заманғы еңбек нарығына қажетті, бәсекеге қабілетті мамандарды даярлау үшін, халықаралық стандарттарға бағытталған жоғары сапалы білім беру қызметтерін ұсынып отырған колледжде 600 ге жуық студент білім алуда. 

Биыл бұл білім ордасы жуырда ғана пайдалануға берілген Шаңырақ шағын ауданынан бой көтерген еңселі ғимаратқа көшті. Жалпы 1200 студентке арналған заманауи колледж ғимаратына аудан әкімі Еркеғали Әлімқұлов арнайы барып, студенттермен кездесіп, оқу орнының тыныс-тіршілігімен танысты. 

- Президентіміз биылғы Жолдауында еліміздің кадрлық әлеуетін біртіндеп арттыруды тапсырды. Жақсы маман қашанда сұранысқа ие. Сондықтан да Мемлекет басшысы сұранысқа ие болатын кәсіптер үшін білікті мамандар даярлау керектігін алдымызға қойып отыр. Сондай-ақ Қасым-Жомарт Тоқаев ұлт саулығын нығайту үшін кешенді шараларды қолға алып, халықты әлеуметтік қолдау жүйесіне көңіл бөлуде. «Білікті медицина мамандарының тапшылығы – әлі де өзекті. Бұл мәселені шешу үшін, ең алдымен медицина саласындағы білім сапасын барынша арттырған жөн» деп санайды Президент. Көріп отырғанымдай, колледжде студенттердің білім алуына барлық жағдай жасалыпты, - дейген аудан әкімі Еркеғали Әлімқұлов колледж директоры Аманкүл Мейірханқызымен бірге жаңа ғимаратты аралап  пән кабинеттері, мамандыққа даярлауға қажетті практика кабинеттерінің жасақталуымен танысты.  

Колледжде студенттер білім алумен қатар, шығармашылықтарын шыңдауы үшін талапқа сай акт залы, салауатты өмір салтын ұстануды мақсат еткендерге спорт залы іске қосылып, арнайы спорттық қондырғылар орнатылған. 

- Адам өмірі мен денсаулығын қорғау медицина қызметкерлеріне жүктеледі. Сіздер, болашақ медбике ретінде адам тәнінің қиналысын жүректеріңізбен ұғынып, сырқаттарды жанға шипа болатын дәрі-дәрмекпен  ғана емес жылы сөзбен емдеуге үйреніп жүрсіздер. Ақ халатты абзал жанға тән жанашырлық таныта білсеңіздер, мейірім мен кәсіби адалдықтарыңыз өздеріңіз атқарып отырған қызметтеріңізді қоғамның ең биік сатысына шығарады. Дәуір мен өркениет алмасып келсе де, медицина қызметкерлерінің Гиппократ антына адалдығы қажет. Сондықтан, сапалы білім алып, ел игілігі жолында қызмет ете беріңіздер, - деді аудан әкімі студенттермен болған кездесуде.