Сарыағаш ауданында соңғы жылдары атқарылған жұмыс ауқымы кең. Ауданға қарасты елді мекендермен қатар Сарыағаш қаласының да аумағы кеңейіп, тұрғын саны артып келеді. 

Көшелерге асфальт жабыны төселіп, көшелер жарықтандырылуда. Таза ауыз сумен және табиғи газбен қамту жұмыстары да бір жүйеге түскен. Бұл туралы аудан әкімі Арман Абдуллаевтың Сарыағаш қаласының тұрғындарымен өткен қорытынды есебінде жан-жақты айтылған болатын. 

- Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында халықты таза ауыз сумен және көгілдір отынмен қамтудың маңыздылығына да тоқталған болатын. Осы бағытта Сарыағаш ауданының бас жоспарына сәйкес бірқатар елдімекендерге таза ауыз су мен газ құбырлары жүргізілуде. Мәселен, биыл Сарыағаш қаласының 2 көшесі табиғи газбен қамтылды, атап айтқанда Талас және Өскен көшелеріне табиғи газ жүйесі тартылды. Қалаға қарасты С.Ысмайылов көшесінің бойындағы 43/1 көпқабатты тұрғын үйлері ауыз сумен қамтылды. Сонымен қатар, Самал-3, Мөлтек шағын ауданын ауыз сумен қамтамасыз ету бойынша жобалық-сметалық құжаттамасы әзірленіп, сараптама қорытындысы алынды, - дейді аудан әкімі.

Ал аудан әкімінің Саоыағаш қаласында өткен кездесуі ауданның әлеуметтік-экономикалық дамуы жолында атқарылып жатқан ауқымды жұмыстардың жайын баяндап, алға қойған жоспарларымен бөлісуден басталды. «Бүгінгі кездесудің басты мақсаты – ашық пікір алмасып, сіздердің ұсыныс-тілектеріңізді тыңдау. Қаланы көркейту, оның дамуына үлес қосу — ортақ мақсат, ортақ іс. Сондықтан, алға қойылған жоспардың нәтижелі орындалуы басшыға, ал оған жауапкершілікпен қарау тұрғындардың мәдениеттілігі мен жанашырлығына тікелей байланысты. Біз алдағы уақытта жасалып жатқан жұмысты ашық, айқын түрде көрсетіп, оны халыққа жеткізіп отыратын боламыз», - деген еді жиында аудан басшысы.

Жалпы қаланы дамыту жоспарына сәйкес тиісті жұмыстар атқарылуда. Аудан әкімінің айтуынша, жеке кәсіпкер «Досмухамедов» Майлықожа көшесінің бойында еңселі арка орнатылып, ел игілігіне табыстаған. Сондай-ақ қалаға қарасты 34 көшеге жарықшамдар орнатылып, СТО ВАЗ аумағындағы 9 көшенің электр бағаналарын жаңарту жұмыстары жүргізілуде. 

- Президентіміз Жолдауында елдегі бұқаралық спортты дамытуға көңіл бөліп отыр. Бүгінгі таңда ауданда бұқаралық спорт түрлерін дамыту бағытында Сарыағаш қаласы бойынша жалпы 7 балалар ойын алаңшасының  құрылысы аяқталып, ел игілігіне табысталды. Ал көлік-логистикасын дамыту мақсатында бірқатар жобалар қолға алынды. Атап айтсақ, Сарыағаш қаласына қарасты 7 көшенің жолдарына ағымдағы жөндеу жұмыстары жүргізілді. Одан бөлек, негізгі 5 көшеге жол белгілері орнатылып, жол жолақтары сызылып, 9 көшеге аяқ жол салынды. Қалаға қарасты  Бөкейхан көшесінің бойына науа, С.Ысмайлов және Әйтеке би көшелерінің қиылысына «пано» орнатылып, кәріздік тазарту станциясы (КОС) аумағына баратын жолға шағал төсеу жұмыстары жүргізілді. Сондай-ақ, Созақ көшесінің көпірі жаңартылып, Гагарин көшесіндегі тозығы жеткен көпірге құрылыс жұмыстары жүргізілуде, - дейді Арман Абдуллаев.

Сонымен қатар күзгі көріктендіру, көгеріштендіру санитарлық тазалық айлығы барысында қала көшелерінің тазалығына елеулі көңіл бөлінде. Осы ретте, қала аумағында орналасқан №10 көпқабатты тұрғын үйлердің ауласына қоқыс жәшіктері қойылып, Бәйтерек көшесіндегі көпқабатты тұрғын үйлер аумағына қосымша 14 қоқыс жәшігі орналастырылған. Жалпы қала тұрғындары атқарылып жатқан жұмыстар бойынша аудан басшысына оң бағаларын беріп, әрбір атқарылып жатқан жұмыстардың орындалу барысын және нақты мерзімін ашық атап өткеніне ризашылықтарын білдірді. Кездесу соңында қала тұрғындарын аудан әкімі жеке мәселелері бойынша қабылдап, заң аясында жауап берді.