Мемлекет басшысы Жолдауында инвесторлардың демеушілігімен спорт, мәдениет пен денсаулық, білім нысандарын салуды ұйымдастыруды әкімдерге жүктеген болатын. 

Осы бағытта Ордабасы ауданында атқарылып жатқан жұмыстар бар. Бүгінгі күні Ордабасы ауданына қарасты Шұбарсу ауылында жеке инвестор есебінен 600 орындық жаңа «MIRAS» intellectual school мектебі ашылды. Енді Шұбарсулық балалар заманауи білім ордасында білім алады. 

- Президент Жолдауында инвесторларға көп міндет жүктеп, үміт артып отыр. Бүгінгі таңда Түркістан облысында білім саласына жеке кәсіпкерлердің инвестиция салуына қолайлы жағдай жасалған. Мемлекеттік қолдаудың нәтижесінде жеке инвесторлар тарапынан салынып жатқан мектептердің саны артып келеді. Қыркүйек айында Ордабасы ауданының орталығы – Темірлан ауылында типтік үлгідегі жаңа «Болашақ ұрпақ» мектебі пайдалануға берілген болатын. «Болашақ ұрпақ» мектебінде оқушылардың сапалы білім алуына барлық жағдай қарастырылған. 242 орындық білім ұясында заман талабына сай жабдықталған пән кабинеттері, асхана, спорт зал, кітапхана бар. Оқушылардың қауіпсіздігі үшін ғимарат бейнебақылау камераларымен толық қамтылған. Сонымен қатар мектептен 4 бағытта 4 автобус қатынайды. Енді, міне осы мектептен кейін іле инвесторлардың демеушілігімен ауданда 600 орындық жаңа «MIRAS» intellectual school мектебі ашылып, пайдалануға беріліп отыр. Бұл біз үшін қуанардық жағдай. Осындай демеушілеріміз көп болсын, - дейді аудан әкімі Азат Оралбаев. 

Ол білім ұясының ашылу салтанатына аудан әкімі Азат Оралбаев, ардагерлер, ата-аналар мен тұрғындар қатысты. Ашылу рәсімінде сөз сөйлеген аудан әкімі жаңа мектептің ауылға тек білім беріп қана қоймай, ауылдың әлеуметтік дамуына да серпін беретінін атап өтті. Сондай-ақ, мектеп салып, ауылды дамытуға өз үлесін қосқан жеке инвесторға алғысын білдірді. 

Жаңа мектепте оқушылардың сапалы білім алуы үшін барлық жағдай жасалған. Онда кең әрі жарық оқу кабинеттері, спорт және мәжіліс залдары, кітапхана, пәндік сыныптар, асхана мен демалыс аймақтары қарастырылған. Мектептің қауіпсіздігі де ерекше назарға алынып, бейнебақылау камералары мен өрт қауіпсіздік жүйесі орнатылған. Оқушылардың демалыс және спортпен айналысуы үшін ашық спорт алаңдары да бар.