Елімізде енді көлік қозғалысы кезінде терезеден басын шығарғандарға да айыппұл салу көзделуде. Бұл туралы ОКҚ-да өткен брифингте ІІМ Әкімшілік полиция комитетінің төрағасы Қайсар Сұлтанбаев мәлім етті, деп хабарлайды RGmedia.kz тілшісі.
"Бізде кейбір кезде жастар көліктен басын шығаратын қауіпті жағдай болып жатады. Осы бойынша да әкімшілік кодекске және заңдарға өзгерістер енгізілді. Бұл норма ең алдымен жолаушыларды тасымалдау кезінде өмірі мен денсаулықтың қауіпсіздігіне бағытталған. Мектеп бітіру кештерінде, үйлену тойлары кезінде көптеген кісі өздерінің қауіпсіздігіне мән бермей, осындай әрекеттер жасап отыратыны рас", – дейді Сұлтанбаев.
Енді қозғалыс кезінде көліктің терезесінен басын шығарғаны үшін 10 АЕК – 39 320 теңге, (1 АЕК – 3 932 теңге) айыппұл салынады. Бұл кезде жауапкершілік жолаушыға да, жүргізушіге тең дәрежеде әсер етеді.