Бүгінде барша әлем елдерінде белең алған тұрмыстық заң бұзушылық біздің елімізде де өзекті мәселелердің бірі болып келеді. Зерттеулер бойынша оның басты себептерінің біріне етек алған маскүнемдік, жұмыссыздық, соған байланысты тұрмыс жағдайының ауырлығы сияқты әлеуметтік жайлар жатады. Тұрмыста жапа шегетіндер негізінен әйел мен балалар. Көп жағдайда, әйелдерге қатысты зорлық – зомбылықтың көптеген фактілері тіркеусіз қалады, өйткені қылмыстың құрбандары үйдегі ұрыс-керісті сыртқа шығармау керек деген ертеден келе жатқан ұғымды ұстанып ол туралы айтпайды. Бұл мәселе мемлекет басшысы қасым-Жомарт Тоқаевтың да назарынан тыс қалмады. «Отбасылық зорлық-зомбылықты қылмыс санатына жатқызу мәселесі қоғамда көптен бері талқыланып жүр. Құқық қорғау органдары бұл ұсыныстың дұрыс екеніне күмәнмен қарайды. Себебі, мұндай тұрмыстық жағдайларды анықтау оңай емес, яғни осындай оқиғаларды тергеп-тексеру қиынға соғады. Бұл сөздің де жаны бар. Бірақ қалай десек те, отбасылық зорлық-зомбылыққа көз жұма қарауға болмайды. Отбасында ойран салатындар жазаға тартылмаса, олар одан бетер басынып кетеді. Ал жапа шеккендер мүлдем қорғаусыз қалады. Мұндай әрекеттер үшін жазаны күшейтетін кез келді деп санаймын. Зардап шеккен жандар елдің сөзінен немесе біреудің қысым жасауынан қорықпауы қажет». Осылай деген Президент биылғы халыққа арнаған жолдауында сала басшыларына гендерлік зорлық-зомбылықтың алдын-алу, күресу мақсатында нақты тапсырмалар жүктеді.
Гендерлік зорлық-зомбылықтан зардап шеккен адамдарға көмек көрсету үшін практикалық медицина мамандарының әлеуетін арттыру қажет. Сондай-ақ зорлық жағдайларына жауап беретін денсаулық сақтау жүйесін құру да басты назарда. Ол үшін жыл сайын дәстүрлі түрде семинарлар мен тренингтер өткізілуде. Осындай жиынның бірі жақында Түркістан қаласында өтті.
«Семинар төрт күнге жалғасады. Шараның негізгі мақсаты денсаулық жүйеіндегі зорлық-зомбылыққа жауап бере алатындай, төтеп бере алатындай жүйені құру, сол жүйенің жұмысын жақсарту»,- дейді БҰҰ-ның халықтың қоныстануы қорының ұлттық кеңесшісі Сағадат Сәбитова.
Жиынға қатысқан сала мамандары мен дәрігер, психологтар өз ойларын ортаға салып, мәселенің шешімін табуға тырысты.