Адам бас сүйегіне ұқсайтын астероид 11 қарашада Жерге 38 миллион шақырымға жақындайды деп жазады Oxu.Az сайтына сілтеме жасаған NUR.KZ.
Бұл ерекше астероидты ғалымдар 2015 жылдың күзінде байқаған болатын. Сол жылы ол Жердің жанынан 31 қазанда өткен, сондықтан оны "хэллоуиндік астероид" деп те атап кеткен.
Жерге 486 мың шақырымға жақындағанда ғалымдар оны суретке түсіріп алған. Суретте астероидтың маңдайы, иегі, көзі мен таңауы анық көрінеді.
Бұл астероидтың ерекшелігі - өлі құйрықты жұлдыз болуы. Мұндай тұжырым жасауға оның жылдамдығы мен сопақша келген орбитасы себеп болған. Күнге жиі жақындағандықтан "құйрығынан" айрылған көрінеді.
Бас сүйекке ұқсайтын астероидтың тағы бір ерекшелігі оның қара түсті болуы. Осының салдарынан аспан денесі түскен жарықтың 94 пайызын жұтып отырады екен.
Ғалымдар: "Бас сүйек тәрізді" астероид өз пішінін жоғалтуы әбден мүмкін", - деген болжам да жасап отыр.
Бұл астероид келесі жолы Жерге тек 2082 жылға қарай жақындауы мүмкін.