Ордабасы тұрғындары ауыл шаруашылығына оның ішінде әсіресе егін шаруашылығымен, бағбандықпен айналысуға бейім келеді. Аудандағы тағы бір бағбан бұл жолы ерекше жеміс түрлерін өсіруге эксперимент жасап жүр. Оның айтуынша аталған кәсіп түрі жақсы өнім алуға мүмкіндік береді екен.
Ауданға қарасты Қажымұқан ауыл округінде орналасқан «Елнұр-Айдар» өндіріс кооперативі 2017 жылдан бері тропикалық жемістер мен алма бауын өсірумен айналысып келе жатыр. Қазіргі таңда 1 гектарға анар, 3 гектар жерге алма, 0,5 гектарға лимон еккен.
Қожалықтың іс жүргізушісі Сейдазимов Елнұр бүгінгі таңда 1000 түп анар, 6000 түп алма, 707 көшет лимонды өсіріп отыр. Лимонның өзінен биыл 20 тонна өнім алуды жоспарлауда. Былтыр 1 жылдық көшеттің өзінен 4 тоннаға жуық өнім алған екен. Аталған кооператив 7 адамды тұрақты жұмыспен қамтып отыр.
Сонымен қатар, ауданда қарқынды бау көлемі артып келеді.