Түркістан облысына қарасты Қазығұрт ауданы, Атбұлақ ауылы, Ж.Қаппаров атындағы №5 мамандандырылған мектеп-интернат базасында «Жамбыл Қаппаров атындағы облыстық физика-математикалық олимпиадасы» өтуде.
Олимпиадаға 10-нан астам мамандандырылған білім беру ұйымдары және Кентау қаласы №3 Білім-инновация ер балалар лицей-интернатының 10-11 сынып оқушылары қатысуда.
Олимпиаданың мақсаты: оқушылардың шығармашылық қабілеттерін және физика-математика пәндеріне деген қызығушылығын анықтау және дамыту. Жалпы білім беретін мектепте ерекше дарынды балаларды анықтау үшін шығармашылық орта құру керек. Кез келген қоғамға дарынды адамдар қажет және қоғамның басты міндеті оларды анықтап, қабілеттерін дамыту. Алайда, өкінішке орай адамдардың барлығы бірдей өздерінің қабілеттерін өз беттерінше дамытуға дайын емес. Көбінесе бұл жағдай олардың отбасына және мектебіне тәуелді. Отбасының міндеті баланың қабілетін уақытылы көре білу, ал мектептің міндеті – балаға қолдау көрсетіп, оның қабілетін дамыту және оны іске асыруға жағдай жасау. Дәл осы мектеп жасындағы баланың өзіндік шығармашылық тұлғасының негізі қалануы керек. Оқу әрекетінің мұндай жүйесі дарынды балаларды озық ойлылыққа, жан-жақты салыстырушылыққа, қызығушылыққа тәрбиелеп, түрлі болжамдар жасай алуға үйретеді.
Байқауға қатысушылар Қазақстан Республикасы Білім және ғылым министрінің 2012 жылғы 13 наурыздағы № 99 бұйрығына сәйкес «Облыстық дарынды балаларды анықтау және қолдау орталығы» КММ-нің І, ІІ, ІІІ дәрежелі дипломдарымен, Нұрлан Қаппаров атындағы қоғамдық қорының демеушілігімен бағалы сыйлықтар және естелік медальдарымен марапатталады. Айта кетейік, олимпиадаға қатысушылар 7 балдық жүйемен бағаланады.
