Түркістан облысы Қазығұрт ауданында өнеркәсіп өнімі көлемінің жыл сайын артуына аймақтағы индустриалды аймақтың үлесі мол. Бүгінгі таңда, «Қазығұрт» индустриалды аймағында жалпы құны 7,3 млрд. теңгені құрайтын 5 жоба орналастырылған.
«CG Foods Central Asia» ЖШС-і 2019 жылдың желтоқсан айынан бастап тез әзірленетін 10 түрлі «Қазан» және «Wai-Wai» маркалы кеспе өнімін шығаруда. Ол тай тілінен аударғанда «тез-тез» деген мағынаны білдіреді. Жергілікті тұтынушылар үшін өнімнің маңызды тұсы – барлық өнім халал болмақ.
Жалпы инвестиция көлемі 5,7 млрд. теңге, 2019 жылы 1,1 млрд. теңге инвестиция салынып, тез дайындалатын кеспе цехын толық жаңғыртып отыр.
Бүгінгі таңда зауытта 80 адам жұмыспен қамтылған. Кәсіпорынның даму жоспарына сәйкес, алдағы жылдары жұмысшылар саны 300-ге жететін болады. Кәсіпорын ағымдағы жылдан бастап жылына 1 100 тонна өнім шығарып, оның 20 пайызын Қазақстан Республикасы аумағында тарқатса, 80 пайызын Орта Азия елдеріне экспорттамақ.
Аталған инвестициялық жобаға «TURKISTAN INVEST» компаниясының ұжымы үлкен қолдау білдірген. Тиісті құжаттарды дайындау, жер телімін заңдастыру, техникалық және инфрақұрылымдық мәселелерді шешуге дейін бір терезе қағидасы бойынша қызмет көрсетіпті.