Бүгіннен бастап Түркістан қаласына әскери күш кіргізілді. Бұл туралы Түркістан қалалық Полиция басқармасының бастығы Бауыржан Селтанов фейсбуктегі жеке парақшасында жазды деп хабарлады RGMEDIA.KZ ақпарат агенттігі.
«Құрметті Түркістан қаласының тұрғындары!
Бүгіннен бастап Түркістан қаласына әскери күш кіргізілді. Қала аумағындағы блок-бекеттердегі төтенше жағдайға байланысты сақтық шаралары мен тыныштықты күзетуге әскери қызметкерлер де атсалысады. Одан бөлек, қала көшелері мен қоғамдық орындарда және аулаларда вирусқа қарсы залалсыздандыру жұмыстарына да қатысады. Орын алып жатқан жағдайларға түсіністікпен қарап, төтенше жағдай тәртібін бұзбауға шақырамыз. Мұндай қатаң режимдегі тәртіп төтенше жағдай аяқталғанға дейін жалғасатын болады» деп жазды Селтанов.
– Қазақстан Республикасы Қарулы күштерінің Жоғарғы Бас қолбасшысы Қасым-Жомарт Тоқаевтың тікелей тапсырмасымен және Қазақстан Республикасы Қорғаныс министрінің өкімімен, Түркістан облысы әкімінің шешімімен Шымкент гарнизоны әскери құрылымдарынан 200-ге тарта әскери қызметші жұмылдырылды. Бірінші мәселе – бақылау бекеттеріндегі тәртіпті күшейту, екінші мәселе – залалсыздандыру, дизенфекциялау жұмыстарында мамандарға көмек көрсету, – дейді Түркістан облыстық Қорғаныс істері жөніндегі департамент бастығының орынбасары Жандос Күлдеров.
