Ахмет Байтұрсынұлы ХХ ғасыр басындағы ұлт азаттық қозғалыс жетекшілерінің бірі, мемлекет қайраткері, ақын және қазақ тіл білімі мен әдебиетінің негізін қалаушы публицист. Шымкентте ұлт ұстазының 150 жылдық мерейтойына арналған тағылымы мол іс-шаралар жалғасын тауып келеді.
Шымкент қаласы білім басқармасына қарасты А.Байтұрсынов атындағы №50 мектеп – гимназиясының ұстаздары мен оқушылары Орталықтандырылған балалар кітапханасында Индонезия Республикасының Қазақстандағы елшілермен кездесті.
Кездесуде Индонезия Республикасының Қазақстан Республикасындағы елшісі Мохамад Фаджрул Рахман мырза Индонезия халықтары мен қазақ ұлттары арасындағы салт – дәстүрлердің ұқсастығы бар екеніне тоқталып, оқушылармен өзара ой бөлісті. Ал өз кезегінде Абдрашид Арсен, Шайзанда Аяулым, Асанова Жания, Нұрланқызы Нанури, Алғабас Нұртөре ағылшын тілінде А.Байтұрсынұлының аудармаларын, өмір жолын және өздері білім алатын мектебі туралы айтып берді. Рахман мырза оқушылардың ізденпаздығына, талапшылдығына ризашылығын білдірді.
Іс шараға қатысушылар Ахмет Байтұрсынұлының өмірі мен қызметін мысал ете отырып, жастарға отанға қызмет етудін ерең үлгісін баяндады. Ұлы тұлғаның өлеңдері мен аудармалары жинақталған кітаптар, «Қазақ» және «Айқап» газеттерінде жарық көрген мақалалары қонақтар назарына ұсынылды.
-Осындай іс шараның мақсаты - ұлт ұстазы болған ағартушының өмірбаянын жастарға баяндап, өскелең ұрпақ арасындағы патриотизмді насихаттау,-дейді осы іс- шараны ұйымдастырушы аталған білім ұясында директордың оқу ісі жөніндегі орынбасары Ұлпан Сексенбаева.
Жыл соңына дейін Ахмет Байтұрсынұлының 150 жылдығы тек республикалық көлемінде ғана емес, халықаралық деңгейде өтетін конференция, концерт және байқаулар көрініс таппақ.
Айгул Салибекова,
А.Байтұрсынов атындағы №50 мектеп гимназиясы тарих пәнінің мұғалімі,
Шымкент қаласы.