Мақтаарал аудандық полиция бөліміне жергілікті тұрғын арызданды. Ер адамның айтуынша, күндізгі сағат 15:00 шамасында егістік алқапта жайылып жүрген жылқыларының ішінен бір бас айғыры жоғалып кеткен. Жәбірленушіге келген шығын көлемі 900 000 теңге. Аталған жайтты полиция қызметкерлері ҚР ҚК-нің 188-бабы 1-бөлігі «Ұрлық» бойынша тіркеуге алды.
Оқиға орнына барған тәртіп сақшылары іздестіру жұмыстарын жүргізді. Сақшылардың тыңғылықты жұмысының нәтижесінде Сырдария өзенінің жағасындағы жайылым алқаптан табылды. Жоғалған жылқы заңды иесіне қайтарылды.
Тұрғын жылқысын тауып берген полицейлерге алғысын білдіріп: «Мен полиция қызметкерелеріне жылқымның жоғалғанын айтып, тауып беруін сұраған едім. Полицейлер Шымкент қаласының, Сарығаш, Шардара аудандарының базарына менімен бірге барып, жылқымды іздеуге ат салысты. Олардың жасаған жұмыстарына алғыс білдіремін. Жұмыстарыңызға сәттілік!» - деді.
Түркістан облысы ПД баспасөз қызметі