Биыл Түркістан – Түркі әлемінің туристік астанасы атанды. Бұл мәртебе тарихи шаһарды одан әрі әлемге танытуға сеп болмақ.
Түркістанда түркі елдері өнерпаздарының қатысуы «Армысың, әз Наурыз!» салтанатты іс-шарасы өтті. Мерекелік жиынға халықаралық «Voice of Turan-2023» қазақ әндері фестивалінің жеңімпаздары Лаэлия Алиева (Әзербайжан), Татьяна Ефремова (Татарстан), Zainetdin (Башқұртстан) келді.
Сондай-ақ Ардақ Балажанова, Махмуд Урумбаев, «Асыл әжелер» ансамблі, «Бисұлтан» би ансамблі, Райымбек Сейтметов атындағы Түркістан сазды-драма театрының және Құрманбек Жандарбеков атындағы Жетісай драма театрының әртістері, «АКА» шығармашылық орталығының оқушылары және «Тұмар», «Жұлдыздар», «Балауса», «Еркетай», «Таңшолпан», «Керуен», «Сымбат» хореграфиялық ұжымдары өнер көрсетті. Одан бөлек концерттік бағдарламаға «Тuran» boys, «Яссы», «Фараб» би ансамбльдері Шәмші Қалдаяқов атындағы облыстық филармониясының және «Конгресс холл» көпсалалы кешенінің өнерпаздары, «Алқоңыр» фольклорлық ансамблі қатысып, мерекеге жиылған көпшіліктің көңілін көтерді.
«Табиғаттың оянуы» мен «Армысың, әз Наурыз!» театрландырылған музыкалық хореографиялық қойылымы мен «Түркістан» композициясы және өзге де сахналық көріністер көпшілікке көтеріңкі көңіл күй сыйлады. Қазақ халқының тұрмыс-салт жыры саналатын «Жарапазан» айтылды. Түркі халқының достығы мен ұлттық салт-дәстүр дәріптелетін әндер шырқалды. Киіз үйлер тігіліп, қонақтарға есігін айқара ашты. Ұлттық спорттық ойындары, атап айтқанда қазақ күресі, қол күрес, арқан тарту, тоғызқұмалақ, қошқар көтеру сынды сайыстар өтті. Сонымен қатар «Тұсаукесер» рәсімі, қолөнер шеберлері мен суретшілерінің, ұлттық тағамдардың көрмесі әзірленді. Думанды мереке кешкісін концерттік бағдарламамен жалғасады.
Түркістандағы Наурыз тойына еліміздің өзге өңірлері мен Түркі елдерінен қонақтар келді. Сонымен бірге Еуропа мен Азия елдерінен келген 20-ға жуық БАҚ өкілі Ұлыстың ұлы күніне арнаған дүбірлі тойды тамашалады.