Мәжіліс депутаты Асылбек Нұралин Астанада жұмыс күні басталатын уақытты сағат 9-дан 7-ге ауыстыруды ұсынды.
— Ашық статистикалық деректерге сүйенсек, Астана қаласындағы жұмысшылардың 50%-дан астамы мемлекеттік мекемелерде қызмет етеді. Осыған байланысты орталық атқарушы органдардың ұлттық компаниялардың, ведомстволарға бағынышты ұйымдардың қызметшілеріне арналған көлік ағынын қайта реттеу мәселесін пысықтау қажет. Сондай-ақ, агломерациялардағы көлік саясатының аясында аталған санаттағы ұйымдардың жұмыс уақытын ауыстыру мәселесін қарастыру ұсынылады, — деді ол.
Депутаттың айтуынша, таңғы 8:00 бен 9:00 аралығында елорда көшелерінде көлік тығыздығы күрт артады. Бұл уақытта мемлекеттік қызметкерлер, жеке сектор өкілдері, оқушылар мен студенттер барлығы бір мезетте жолға шығады. Нәтижесінде жолда кептеліс, қоғамдық көлікте лық толы жағдай туындайды.
Егер жұмыс уақыты сағат 7:00-де басталса, бұл қаладағы қозғалысты біршама ретке келтіріп, азаматтардың жолға кететін уақытын қысқартуға сеп болар еді, - дейді депутат.