"Қазгидромет" РМК синоптиктерінің мәліметтеріне сүйенсек 17, 18 және 19 маусым күндері Қазақстанның кей өңірлерінде жаңбыр жауса, кей аймақтарда аптап ыстық күтілуде деп хабарлайды RGmedia.kz тілшісі.
Елдің басым бөлігінде солтүстік-батыс циклонының өтуіне байланысты ауа райы тұрақсыз болады: найзағай ойнап, жаңбыр жауады, жел күшейеді. 18-19 маусымда солтүстік-батыс пен солтүстік өңірлерде күшті жаңбыр жауып, бұршақ түсуі мүмкін.
Солтүстік-батыс пен солтүстікте түнгі ауа температурасы 17-25 градустан 15-23 градусқа дейін төмендейді, ал күндіз 25-35 градустан 20-31 градусқа дейін түседі. Орталық өңірлерде түнде 18-25 градустан 15-22 градусқа дейін төмендейді. Ал 17-18 маусым күндері күндізгі температура 35-39 градусқа дейін көтерілмек. Облыстың оңтүстігінде аптап ыстық 42 градусқа дейін жетеді. 19 маусым күні күндізгі температура 27-32 градусқа дейін төмендейді.
Шығыс өңірде түнде температура 12-23 градустан 17-25 градусқа дейін көтеріледі, күндіз 27-35 градустан 35-39 градусқа дейін ыстық болады. 19 маусымда кей аудандарда өте қатты ыстық – 40 градус күтіледі.
Оңтүстік-шығыста түнгі температура аздап көтеріліп, 18-23 градустан 20-25 градусқа дейін жетеді. Күндіз 35-39 градусқа дейін қатты ыстық болады, 18-19 маусымда кей жерлерде өте қатты ыстық – 42 градусқа дейін көтеріледі.
Ал оңтүстік өңірлерде күндізгі температура 43-46 градусқа жетіп, кейін 30-38 градусқа дейін төмендейді.