Коронавирус Қазақстанға Қытайдан емес, Германиядан келді. Бұл туралы бүгін Орталық коммуникациялар қызметінде өткен баспасөз мәслихатында Денсаулық сақтау министрі Елжан Біртанов айтты, деп хабарлайды RGMEDIA.KZ ақпараттық агенттігі.
– Үш айдан бері біз коронавирусқа Қазақстанда жол бермеу бойынша көп шараны іске асырған едік. Бірақ, өкінішке қарай, бүгін бірнеше рет тексергеннен кейін Қазақстанның екі азаматында коронавирус инфекциясы табылды. Бүгін біздің Алматыдағы лабораторияда Қазақстанның екі азаматынан коронавирус расталды. Олар Германиядан келгендер, – деді Елжан Біртанов ОКҚ-да өткен баспасөз мәслихатында.
Коронавирус жұқтырған қазақстандықтар бас санитар Бекшиннің қаулысымен карантиндік стационарға жатқызылған. Қазір барлық шара бекітілген алгоритм бойынша жүргізіліп жатыр.