Елде жарияланған төтенше жағдайға байланысты банкке берешегі бар қазақстандықтардың барлық кредитін төлеу кейінге қалдырылған болатын. Өйткені карантиннің кесірінен елдегі кәсіпкерлік нысандардың 80% жұмысын тоқтатты. Халық табыс көзін жоғалтты, отбасыға кіретін кірісі азайды.
Мемлекет басшысы Қасым-Жомарт Тоқаев мұндай бастамаға банктердің түсіністікпен қарайтынына сенім білдірген еді.
Президент тапсырмасына сәйкес, карантин кезінде жұмыстан босаған немесе ақысыз демалысқа шыққан, сондай-ақ кірісі төмендеген азаматтарға 16 наурыздан кейін өтелуі тиіс төлемдері 90 күнге тоқтатылды. Ескерте кетейік, несие төлемі кешірілген жоқ, тек кейінге шегерілді.
Мемлекет қолдауына шымкенттік тұрғындар да дән риза. Сондай азаматтың бірі - қала тұрғыны Жадыра Ғалымқызы.
"Рақмет, осындай кезде несиеміз шегеріліп, қолдап жатқандарына алғыс білдіреміз",- дейді ол.
- Осындай жағымды жаңалықтан соң барша қала тұрғындары өңірде орналасқан банктерге жаппай ағылуда. Барлық қаржы қызметкерлері тұрғындардың талап-тілектерін тыңдап, тиісті шараларды қолға алған. Еліміздегі қазіргі көңіл көншітпейтін кезеңде кәсібі тоқтап, несиесін төлеуге қиналған азаматтар үшін қабылданған бұл шешімнің оң пайдасы тиді. Қиын кезеңде қолдау білдірген Мемлекетке тұрғындар алғыстарын айтуда, - дейді Қаржы нарығын реттеу және дамыту агентігінің Шымкент қаласындағы өңірлік өкілдер басқармасының басшысы Әбілқазы Қалназаров.
Айта кетейік, Ұлы Отан соғысының ардагерлері мен I, II топтағы мүгедектер, алтын және күміс алқа иегерлері мен толық емес отбасылар растау құжаттарынсыз ешқандай келісімдерге қол қоймай-ақ, төлемдерін үш айға шегерте алады.
Шымкент қаласы төтенше жағдай штабы