Түркістан қаласы химия-биология бағытындағы Назарбаев Зияткерлік мектебінің ұстаздары игі іс жасауда Түркістан облысы, Бәйдібек ауданы, Бәйдібек ата ауылы, Ақтау жалпы орта мектебіне 100 кітап сыйлады. Осы тұста ауыл мектебіне жасалған ізгі шара «Bookcrossing» жобасы аясында бастау алған болатын.
Еске сала кетейік, Зияткерлік мектептердің 2023 жылғы үздік мұғалімдерін анықтауда мектеп ұстазы Шыңғыс Есенғараұлы желілік байқауға қатысып, ақшалай сыйақы алған болатын. Сыйақының тең жартысын игі іске жұмсауға ниет еткен мектеп ұстазы облысқа қарасты Бәйдібек ауданы, Бәйдібек ата ауылы Ақтау жалпы орта мектебінің кітап қорына өз үлесін қосты. Онымен қоса, ізгі бастамаға мектептің қазақ тілі әдістемелік бірлестігі мен тарих пәнінің мұғалімі Бақытжан Дүкенбай және директор Айдын Тусупжанов та атсалып, қолдау білдірді.
Ендігі кезекте ауыл мектебінің кітап сөресінде қазақ классик жазушыларының көркем шығармаларынан бастап, әлем әдебиетіне дейінгі қиял-ғажайып жанрдағы таңдаулы кітаптар, бестселлер туындылармен толықты.
Ауыл балаларының таным көкжиегін, кітап оқуға деген құлшыныстарын оятуда жанашырлық танытқан мектеп ұстаздарының жасаған игі істері көпке үлгі болары сөзсіз.