Түлкібас ауданының білім бөліміне қарасты мектептерде денсаулық сақтау мен қауіп қатердің алдын алу мақсатында жоспарға сәйкес арнайы іс-шаралар өткізілуде. Атап айтсақ, оқушылардың қауіпсіздігін арттыру мақсатында Асанбай Асқаров атындағы жалпы білім беретін мектебінде Тулкібас стансасының жергілікті полиция бөлімінің полицейі полиция старшинасы Е.Нарбеков, Тулкібас стансасының Вокзал бастығының көмекшісі М.Азимқызы 4,8,9- сынып оқушыларына «Темір жол қауіпті аймақ» тақырыбында түсіндірме жұмыстарын жүргізді.
- Темір жол бойы адамдар үшін қауіпті аймақ қатарына жатады. Азаматтардың пойыздардың қозғалыс аймағында қауіпсіз ережелерін өрескел бұзуы, бұл өлімге әкелетін себеп. Адамдар темір жолды кесіп өткенде, телефонмен сөйлескенде, құлаққаппен жүргенде пойыздың шуымен машинистің сигналын естімейді, сондықтан арнайы белгі қойылған жолмен өту, аспалы көпірмен өту керек, - деді М.Азимқызы.
Сонымен қатар өмір қауіпсіздігі мен жолда жүру ережелерінің қатаң сақталуын, құқық бұзушылықтың алдын алу мен түрлі бұзақылықтарды болдырмау туралы түсіндірме жұмыстарын жүргізді. Оқушылармен сұхбаттар жүргізіліп, сұрақ-жауап алмасты.
Асанбай Асқаров атындағы жалпы орта мектеп директорының тәрбие ісі жөніндегі орынбасары Н.Бибеков мектеп жасындағы оқушылардың өмір қауіпсіздігі жөніне терең тоқталып өтті. Мектеп қызметкерлеріне оқушылардың жол қаупсіздігі ережелерін қатаң сақтау керектігі туралы айтты.
Бұдан бөлек, Абай атындағы мектеп-лицейінде 8-сынып оқушыларының қатысуымен «Денсаулық зор байлық!» атты спорттық жарыс ер балалары арасында өтті.
Ол іс-шарада көзделген мақсат – оқушылар арасында салауатты өмір салтын насихаттау, ұлттық спорт түрімен жүйелі түрде айналысуларына жол ашу, оқушылардың денсаулығын, белсенділігін арттыру.
Жарыс тартысты өтті. Тартысты бәсекеде топтар бар шеберліктерін көрсетті. Жарыстың нәтижесі бойынша Бас жүлдені 8 «б»-сынып оқушылары «Көк бөрі» тобы жеңіп алды, І орынды 8 «а»-сынып оқушылары «TURAN» тобы, ІІ орынды 8 «в» сынып оқушылары «Жалын» тобы иеленді.
