Мемлекет басшысы Қ.Тоқаевтың Жарлығымен бекітілген «Қауіпсіз ел» ұлттық жобасы аясында қолға алынған жүйелі жұмыстар нәтижесінде Түркістан облысында жұмыс берушісінің атынан несиеге алтын шығарып алған алаяқ анықталды. Бұл туралы Түркістан облысы Полиция департаментінің баспаөз қызметі хабарлады.
Төлеби аудандық полициясына жергілікті тұрғын арызданды. Жәбірленуші ер адамның айтуынша, оның атынан танысы банк қосымшасы арқылы несиеге алтын әшекей алған.
Алайда бұл туралы жәбірленуші бір ай уақыт өткен соң, яғни банк тарапынан «қарызыңызды төлеңіз» деген хабарлама келгенде ғана білген. Тұрғын осы мәселенің мән-жайын анықтау мақсатында полицейлерден көмек сұрайды.
Тәртіп сақшылары аталған жайтты Қазақстан Республикасы Қылмыстық кодекснің 190-бабы «Алаяқтық» бойынша тіркеді. Нәтижесінде күдіктінің жеке басы анықталды. Ол бұрын жәбірленушінің үйінде құрылыс жұмыстарын жасаған ер адам болып шықты. Белгілі болғандай, күдікті жәбірленушіге «несиеге алтын әшекей шығарып беремін» деп ұялы телефонын алған. Содан банктен мақұлдау алса да, жәбірленушіге «атыңнан несие шықпады» деп жалған ақпарат берген. Ары қарай алаяқтық жолмен тапқан алтынды ломбардка өткізіп, ақшаны бас пайдасына жұмсап жіберген.
Жәбірленушіге келген шығын көлемі 600 мың теңгені құрайды. Қазіргі таңда іс бойынша тергеу амалдары жүргізілуде.