Мақтаарал АПБ-нің полиция қызметкерлері жергілікті тұрғындарға, соның ішінде қарттарға, ҰОС ардагерлері мен мүмкіндігі шектеулі жандарға құжатын жасап беруге үнемі көмек көрсетіп отырады. Осы мақсатта Мақтаарал АПБ-нің қызметкерлерінен құрылған мобильдік топ жеке куәлігінің мерзімі өткен 80 жастағы атаны анықтады. Содан кейін ақ сақалды атаны ХҚКО-ға жедел жеткізіп, қажетті фото-бейнеге түсірді.
Осылайша Мақтаарал ауданының тұрғыны Оралбек Абдуәлиевке дайын құжатын табыстады. Өз кезегінде жаңа құжатына қол жеткізген атай полиция қызметкерлеріне және оларды басқарып отырған басшыларына алғысын жаудырды.
Жалпы, Қазақстан Республикасы ІІМ-нің тапсырмасына сәйкес Түркістан облысы Полиция департаментінде құжаттанбаған немесе КСРО құжатымен қалып қойғандарға, егде жастағы жүріп-тұруы қиын қарияларға құжат рәсімдеу мақсатында көші-қон қызметкерлерінен арнайы мобильдік топтар құрылып, қарқынды жұмыс жүргізуде. Ең басты мақсат халықты сандалтпай, оларға қолайлы қызмет ұсыну болып табылады.
ТО ПД-нің баспасөз қызметі
