Ұлттық қауіпсіздік комитеті Қазақстанда медициналық бұйымдарды жалған өндіру схемасын әшкереледі, деп хабарлайды Oinet.kz тілшісі.
ҰҚК-нің Сыбайлас жемқорлыққа қарсы іс-қимыл қызметінің мәліметінше, OrdaMed АҚ басшылығы Қазақстан аумағында өз өндірісінің бар екені жөнінде жалған құжаттарды пайдаланып, халықтың денсаулығы мен әл-ауқатын қамтамасыз ету үшін аса қажетті 28 түрлі медициналық жабдықты мемлекеттік емдеу мекемелеріне жеңілдетілген шарттармен жеткізу бойынша заңсыз преференциялар алған.
«Алайда іс жүзінде дайын жабдық шетелден жеткізілген. Соның салдарынан мемлекетке 4,5 миллиард теңге көлемінде залал келтірілді. Тінту барысында OrdaMed АҚ басшылығынан жалпы құны 1 миллиард теңгеден асатын инвестициялық монеталар тәркіленіп, Interdentica, Erkin Brand және OrdaMed компанияларындағы қатысу үлестеріне тыйым салынды», – деп хабарлады ҰҚК.
Сот санкциясымен OrdaMed АҚ-ның техникалық директоры, басқарма төрағасының бұрынғы төрағасы және өндірістік басқарма басшысы қамауға алынды. Сотқа дейінгі тергеу жүргізілуде.
Қылмыстық-процестік кодекстің 201-бабына сәйкес, өзге ақпарат жариялауға жатпайды.