ҚР Ұлттық экономика министрі Тимур Сүлейменов 2018 жылдың қаңтар-қыркүйек айларындағы орташа жалақы көлемін атады, деп хабарлайды ҚазАқпарат.
Министрдің айтуынша, жыл басынан бері 414,5 мың адам жұмысқа орналасқан және қазан айында жұмыссыздық деңгейі 4,8% дейін төмендеген.
«Жалақы бір қалыпты қарқынмен өсуде. Биылғы қаңтар-қыркүйекте орташа айлық жалақы 158,2 мың теңгеге дейін ұлғайды. Жалақының өсуі және инфляциялық процесстердің бәсеңдеуі аясында нақты ақшалай табыс биылғы қаңтар-тамызда 3,5%-ке өсті», - деп атап өтті Тимур Сүлейменов бүгінгі Үкімет отырысында.
Дегенмен, халықтың табысы бойынша өңірлерде түрлі көрсеткіштер байқалған.
«Биылғы қаңтар-маусым айларында 17 өңірдің 13-інде нақты табыстардың өсуі байқалып отыр. Сонымен бірге, 4 өңірде нақты табыстар азайған. Олар - Маңғыстау (-4,5%), Қызылорда (-2,6%), Алматы (-0,4%) облыстары және Алматы қаласы (-0,6%)», - деді Т. Сүлейменов.