Түркістан облысының полицейлері тұрғыннан тіркелмеген шолақ мылтық тәркіледі. Бұл туралы Полиция департаментінің баспасөз қызметі хабарлады.
Қазығұрт ауданы ПБ-ның полиция қызметкерлері «Құқықтық тәртіп» іс-шарасы барысында «Volkswagen Passat» маркалы автокөлікті тоқтатты. Тәртіп сақшылары көлікті тексеру барысында артқы жүк салғышынан 1 дана 16-калибрлі шолақ мылтықты тапты. Аталған жайт ҚР ҚК-нің 287-бабы «Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру» бойынша тіркеуге алынды.
Айғақты зат ретінде тәркіленіп алынған қаруға қатысты сараптама тағайындалды. Қазіргі уақытта сотқа дейінгі тергеу амалдары жүргізілуде. Күдікті ер адам аталмыш мылтықты егістік алқаптан тауып алғанын айтуда.
Өз кезегінде Түркістан облысының полицейлері азаматтарға суық қару қолданумен қылмыс жасағаны, сондай-ақ атыс қаруы мен оқ-дәрілерді заңсыз сақтағаны және өткізгені үшін қылмыстық жауапкершілік қарастырылғанын ескертеді.