Халқымызда: «Ел үмітін ер ақтар, ер атағын ел сақтар» деген қабырғалы да қанатты сөз бар. Түбі бір түркі жұртының қарашаңырағы – қазақ даласының бүгінгі күнге дейін тұтастығын сақтап қалуға сүбелі үлес қосқан батыр тұлғаларымыздың ерлігін ел ешқашан ұмытпақ емес-ті.
Арғы ғасырларда батыр бабаларымыз ұлан-ғайыр жерімізді ақ білектің күшімен, ақ найзаның ұшымен қорғап, ұрпағына аманат еткен болса, білімдінің күні туған заманда да бір жапырақ жер үшін бар болмысы мен күш жігерін жұмсаған батыл да өр азаматтар болды. Сол ел намысы үшін басын саудаға салған дара тұлғалардың бірі де бірегейі 1915 жылы 20 наурызда Ақмола облысы Аршалы ауданы Танакөл топырағында дүниеге келген Жұмабек Тәшенев еді. Бүгінгі таңда 110 жылдығы аталып өтіп отырған тау тұлғаның есімі еліміздегі 8 орта білім беру мекемесіне, 1 жоғары оқу орнына берілген.
2025 жылдың 20 наурызында қазақ халқының біртуар азаматы, мемлекет және қоғам қайраткері, экономист-ғалым Жұмабек Ахметұлы Тәшеневтің ел үшін жасаған теңдесі жоқ ерлігі мен еңбегін дәріптеу мақсатында «Ж.А.Тәшенев атындағы университет» АҚ-ның ұйымдастыруы, қала әкімдігінің қолдауымен дара тұлғаның 110 жылдығына арналған республикалық ғылыми-тероиялық конференция өтті. Ерен еңбегімен танылған тау тұлғаның есімі берілген жоғары оқу орнында бүгінде 60-қа жуық білім беру бағдарламалары бойынша болашақ жас мамандар (бакалаврлар мен магистрант тар) дайындалуда.
Шымкент қаласы «Достық» үйінде өткен аталмыш конференцияның тақырыбына орай сөз сөйлеген Шымкент қаласы әкімінің орынбасары С.Құранбек, Шымкент қаласы Абай ауданы ардагерлер кеңесінің төрағасы Ұ.Бәшенов, Жоғары оқу орындары қауымдастығының президентi, экономика ғылымдарының докторы, профессор Р.Алшанов, ҚР дипломатиялық қызметінің еңбек сіңірген қызметкері, экономика ғылымдарының кандидаты З.Тұрысбеков, кәсіпкер, меценат, техника ғылымдарының докторы С.Сейітжанов, Шымкент қалалық ардагерлер ұйымының төрағасы, ауылшаруашылығы ғылымдарының кандидаты К.Төлебаев, Президент жанындағы Ұлттық құрылтай мүшесі, Мемлекеттік сыйлықтың лауреаты, экономика ғылымдарының докторы, профессор О.Сәбден, ҚР еңбек сіңірген қайраткері, заң ғылымдарының докторы Б.Тұрғараев, Мемлекеттік сыйлықтың лауреаты, филология ғылымдарының докторы, профессор Қ. Ергөбек Жұмабек Ахметұлының табиғи болмысындағы табандылығы, туған еліне деген сүйіспеншілігі және еңбекке келгенде ар алдындағы адалдығы тұрғысында жан-жақты тоқталып, студенттердің санасына сілкініс жасады.
Ел ағаларынан кейін баяндама жасаған М.Әуезов атындағы Оңтүстік Қазақстан зерттеу университетінің ректоры, техника ғылымдарының докторы, профессор Д.Ж.Ахмед-Заки, Ө.Жәнібеков атындағы Оңтүстік Қазақстан педагогикалық университетінің ректоры, тарих ғылымдарының кандидаты, доцент Г.Сүгірбаева, Ж.Тәшенев атындағы университеттің ректоры, техника ғылымдарының кандидаты, профессор Қ.Байболов дара тұлғаның қазақ қоғамы мен тарихындағы орнын ғылыми негізде саралап, студент жастарға рухани азық боларлық мол ақпараттармен бөлісті.
«Ж.А.Тәшенев атындағы университет» АҚ-ның негізін қалаушы, ҰҒА академигі, педагогика ғылымдарының докторы, профессор Оңалбай Аяшев жүргізіп отырған ғылыми конференцияның басында көрнекті тұлғаның қайраткерлігі мен ерлігін, мұрағаттан алынған тарихи деректер арқылы жастардың жүрегіне жеткізетін деректі фильм көрсетіліп, соңы көпшілік алдында үндеу қабылдаумен аяқталды. Конференция барысында ел ағалары тарапынан үндеудің мәтініне «Жұмабек Ахметұлы Тәшеневтің есімін өзінің кіндік қаны тамған Аршалы ауданына беру туралы», сондай-ақ ерлігімен ел есінде қалған рухы биік тұлғаны «Халық қаhарманы атағына ұсыну» туралы ұсыныстар түсті. Жастарымыз үшін мәні терең шараның соңы Ж.Тәшенев бюстінің алдына салтанатты түрде гүл шоқтарын қою рәсіміне ұласты.
Ғалымжан БИТҰРСЫН
«Ж.А.Тәшенев атындағы университет» АҚ-ның
Мәдени-әлеуметтік даму жөніндегі проректоры,
Ұлттық Заң академиясының корреспондент-мүшесі