Балалар екпесіне қатысты қазіргі таңда қоғамда түрлі теріс пікірлер айтылып жүр. Мәселен екпе балалар арасында аутизм дертін өсіре ме деген журналистердің сұрағына Үкімет отырысынан кейін өткен брифингте Денсаулық сақтау министрі Ақмарал Әлназарова жауап берді деп хабарлайды rgmedia.kz тілшісі.
"Бұл – миф. Себебі барлық мемлекеттер екпенің көмегімен балаларды инфекциядан қорғап келеді. Сондықтан мұны екпемен байланыстыруға болмайды", – дейді министр өз сөзінде.
Ведомство басшсының айтуынша, аутизм диагнозының жиі қойылуы – медицинаның дамып, ерте анықтау мүмкіндігінің артқанымен байланысты.
"Аутистикалық ауытқуы бар балалардың саны артып жатқандай көрінеді. Бірақ бұл шын мәнінде ерте диагностиканың нәтижесі. Ауытқуды ерте анықтау өте маңызды. Себебі алдын ала ем жасап, бала мектеп жасына жеткенше қоғамға бейімделуіне көмектесуіміз керек", – деді Ақмарал Әлназарова.