Ақтау қаласы 29-шағын ауданда орналасқан «Abu Baby» балалар киім дүкенінің иесі балалар мерекесіне орай азық-түлік пен сыйлықтарды тегін таратамын деп айыппұл арқалады деп жазады rgmedia.kz тілшісі. Себебі мерекелік шараға тұрғындар көп жиналған. Мұның соңы тәртіпсіздікке ұласты. Адамдар бір-бірін қысып, тапталып қала жаздаған. Балалар адасып, қоғамдық тәртіп бұзылған.
Ақтау қаласы әкімінің баспасөз қызметінің хабарлауынша, кәсіпкер аталған шараны жергілікті атқарушы органға алдын ала хабарламаған.
— Сондықтан дүкен иесіне Қазақстан Республикасының Әкімшілік құқық бұзушылық туралы кодексінің 488-1 бабына сәйкес (қоғамдық іс-шараны хабарламай не келісім алмай өткізу) 20 айлық есептік көрсеткіш мөлшерінде айыппұл салынады, — делінген хабарламада.